Azpeitiko Udalak azken urteotan eremu pribatuan, eta batez ere zaintzan, emakumeek egiten duten lana aztertu, errekonozitu eta bistaratzeko nahia edo helburua izan du: "Hasierako asmoa zaintza lanen inguruko azterketa egitea bazen ere, ez dugu modu egokirik bilatu hori egiteko. Aukerak aztertzen ari ginela, ordea, denboraren erabileraren neurketa aztertzeko egitasmoa ezagutu genuen, eta horrek guk bistarazi nahi dugun errealitatea isla dezakeela ondorioztatu genuen, eta azterketa hori egiteari ekin genion. Denbora adierazle egokia dela uste dugu", azaldu du Leire Etxaniz zinegotziak.
Gaur egun inork ez du denborarik ezertarako, nahiz eta lan oso ezberdinak izan, ardura desberdinak izan eremu pribatu zein publikoan. Baina, zertaz pasatzen dugu denbora? Zein diferentzia daude generoaren arabera? Denboraren erabileraren inguruan egiten ari den ikerketaren bidez emakumeen ezkutuko lana ikusaraztea da helburua.
Hainbat ekintza
- Irailak 19: 'Ladrones del tiempo' dokumentalaren emanaldia eta Cosima Dannoritzer zuzendariarekin solasaldia
Cosima Dannoritzer zuzendariaren (‘Comprar tirar comprar’ dokumentalaren egilea) dokumental berri honetan denbora erdigunean jartzen da; guztiak nahi duten errekurtso berria da denbora, gure denbora. “Ahaztu petroleoaz, uraz edo mineraletaz. Ikerketa berri honetan erakusten zaigun bezala, denbora trukerako txanpon berria bihurtu da eta gure esku dago errekurtso baliotsu bezain mugatu honen kontrola berreskuratzea”.
Eguna eta ordutegia: Irailak 19, asteazkena, 21:00etan.
Lekua: Soreasu antzokia.
- Urriak 2: 'Reforma horaria' herri ekimena: berdintasunerako tresna berria
2014an herri-ekimen hori abian jarri zenetik, Katalunian pauso aipagarriak eman dituzte denboraren erabilerari dagokionean. Herritarrak beraien eguneroko denbora askatasun handiagoz kudeatu ahal izatea da proposamenaren helburua: jendartearentzako ordutegi egokiagoak bultzatzen dira, emakume eta gizonen arteko berdintasuna ahalbidetzen dutenak, eta harreman, osasun zein ongizate maila hobeak lortzeko aukera ematen dutenak. Udalerri-mailako proposamena, eta egindako ibilbidea aurkeztuko dizkigute solasaldian.
Hizlaria: Fabian Mohedano, proposamenaren sustatzailea.
Eguna eta ordutegia: Urriak 2, asteartea, 19:00etan.
Lekua: Sanagustin kulturgunea.
- Urriak 17: Zertan erabiltzen dugu denbora azpeitiarrok?
Denbora neurtzeko egitasmoaren baitan, herritarrekin hausnarketa saio bat egin nahi da. Bertan, inkestetatik jasotako lehen datuen lehen zertzeladen berri emateaz gain, denboraren erabileraren inguruko hausnarketak eta iritziak plazaratzeko gune izatea du helburu. Hausnarketa saioa Elhuyar dinamizatuko du.
Eguna eta ordua: Urriak 17, asteazkena, 18:00etan
Lekua: Emakume Txokoa
Inkestak betetzeko aukera, urriaren 7ra arte
Ekainaren hasieran etxez etxe banatu ziren inkestak, eta ordutik inkestak jasotzen ari da Udala. Hala, uda ostean, urriaren 7ra arte izango da horretarako aukera. Paperean zein on-line bete daiteke. Paperean bete nahi duenak uzteko postontziak oraindik kalean daude, eta inkestak udaletxean zein Emakume Txokoan eskuratu daitezke. Horretaz gain, datozen bi ekintzetan ere izango da aukera inkestak betetzeko.
On-line bidez egiteko aukera udaletxeko webgunean dago.