Ibaia maiz aztertu ondoren baranden azpian burdin-sareak jartzea proposatu zuen herritar talde batek: “Arazoaren sustraia gure kaleetan barreiatuta ikus ditzakegun hondakinen kopuru handia da, ez soilik jende asko biltzen den egunetan, jaietan, kontzertuetan eta abarretan, baizik eta urteko edozein egunetan, nola; tabako-bilgarriak eta gozokiak, plastikoak, paperak, poteak eta zigarro-muturrak, besteak beste, haizeak edo euriak eramaten baititu gehienbat”, adierazi du Gorka Alberdi proposamena egin zuen herritar taldeko eta Eguzki Talde Ekologistako kideak.
Azken asteotan, pauso berri bat eman da. Proposamen zehatza egin zioten Udalari: kaleko plastiko eta zikinkeriak ibaira ez erortzeko sarea jartzea barandan zeuden guneetan. Eskaera egin ostean, elkarrekin Azpeitiko errealitatea aztertu zuten, eta 845 metro inguruan sarea jartzeko plagintza egin dute. Azpeitian, ibaiaren ertzetan horma dago gune askotan, eta hormak babesten du zikinkeriatik ibaia.
Egindako plangintza abian jarri dute, eta dagoeneko Alde Zaharraren inguruko hainbat gunetan sarea ikus daiteke. 2019an, 845 metro horietatik 250-300 metro inguruan jarri da sarea proba gisa, eta Udalak datorren urtean, babes gabeko guneak egokitzeko konpromisoa hartu du.
Biak jakitun dira ibaien zikinkeriaren arrazoi bakarra ez dela kaleen zikinkeria. Esaterako, erreketatik gertu dauden industrialdeetan, eta obretan sortzen diren hondakinen gaia lantzeko beharra ikusten dute. Ahaztu gabe gaur egun oraindik ere zuzenean zaborretara botatzen direla zaborra ez diren hondakinak; hala nola aulkiak, mahaiak, trafiko seinaleak eta piboteak zuzenean ibaira, ur zikinak estolderiara, eta hondakinak mendi bideetara… “Jokabide horiek erabat debekatuta daudela gogorarazi nahi dugu, horrela jasotzen du araudiak. Horrekin guztiarekin amaitzea ere, herritarren esku dago ", adierazi dute.
Bukatzeko, Alberdik eskerrak eman nahi izan dizkio Azpeitiko Udalari: “Benetan eskertzen dugu Azpeitiko Udalak Urola ibaia hobetzeko hartutako konpromisoa”. Ibaiaren garrantzia eta kalean sortzen diren hondakinen inguruko sentsibilizazioa lantzeko hainbat ekintza ere badituzte eskuartean, epe motzean egiteko.
