Iazko ekainean egin zen ‘Argiztatutako gauak’ lehen aldiz, eta arrakasta ikusita, aurten berriro elkartu dira Juan Antxieta Musika Eskola, Kulturaz eta udala gazteen kontzertuak antolatzeko.
Juan Antxieta musika eskolan musika ikasketetako ikasleak izango dira protagonista. Lehen kontzertua ostiralean, ekainak 9, 22:00etan hasita izango da. Pianoari eskainitako kontzertua izango da. Lehen kontzertu horretan parte hartuko dute Liher Berezibar, Yera Elorza, Sara eta Maier Badiola, Intza Ituarte, Itxaro Aldaburu, Ainhitze Txapartegi, Maialen eta Naia Olea, Intza Osinalde, Nahia Pineda eta Libe Egurzak.
Bigarren kontzertua ekainaren 29an, ostegunean, 21:30ean hasita soka emanaldia izango da. Bertan protagonista izango dira Erik eta Sara Jones, Laine Juaristi, Nikole Landa, Oier Sagardogi, Nora Gorrotxategi, Joane Larrea, Maier Raña, Julen Rezabal, Hurritz Querejeta, Maddi Unanue, Ashley Tapia, Iban Arruabarrena, Denis Arzallus eta Amaia Dorronsoro.
Hirugarrena Txistu kontzertua izango da eta ekainaren 30ean, ostiralean 22:00etan egingo da. Garazi Aldaburu, Nahia Campos, Laida Lizaso, Enaitz Zubizarreta, Jone Odriozola, Jon Azpeitia, Saioa eta Egoi Berezibar, Eider Gurrutxaga eta Janitz, Alain eta Maria Sorazuk hartuko dute parte bertan.
Kontzertuak Soreasuko plazatxoan izango dira, kandelen argiztapenekin; eguraldiak laguntzen ez badu Dinamoko beheko solairuan, sarreran, izango dira.
Kultura batzordearen proposamen batetik sortu zen iaz egitasmoa eta Eneritz Albizu batzordeburuak azaldu duenezn bi helburu nagusi ditu: “Alde batetik, gehiegi programatzen ez diren kontzertu motak eskaintzea herritarrei. Ilunabarrean, formatu berezi eta goxoan. Eta, beste aldetik, musika eskolari esker maila ona izatera heltzen dira herriko musikari gazteen talentua ezaguratarazi eta plazan jotzeko aukera eskaintzea”.
