2025. urterako zergak, tasak eta prezio publikoak %3 igotzea onartu dute, aho batez

Zaborraren tasa eta igerilekuko eta kiroldegiko zerbitzuen tasa izango dira salbuespenak, horietan igoera handiagoa izango baita.

Urriko ohiko udalbatzarra egin zuten atzo udal hautetsiek, eta, besteak beste, 2025eko ordenantza fiskalak landu zituzten. Azpeitiko Udalaren egoera ekonomikoa eta gaur egungo egoera sozioekonomikoa kontuan hartuta (batik bat KPIaren datua), zergak, tasak eta prezio publikoak %3 igotzea adostu zuten, aho batez.

Leire Goenaga Ogasun batzordeburuaren esanetan, bi irizpide nagusi izan dituzte kontuan kalkuluak egiteko: “Alde batetik, zuhurtzia; eta, bestetik, zerga progresibitatea”.

Zuhurtziari lotuta, gogora ekarri zuen gastu publikoa finantzatzea dela zuzeneko zergen helburu nagusia. “Gure betebeharra da herritarrei ahalik eta kalitaterik oneneko zerbitzu publikoak eskaintzea; horretarako, beharrezkoa da udalaren sarrerak eta gastuak proportzio berean joatea”. Gaineratu zuen udalari igo egin zaizkiola eskaintzen dituen zerbitzuen kostuak, eta, horrez gain, iaz baino diru gutxiago jasoko duela foro funtsetik, jubilatuei mutualitateagatik itzuliko zaien diruagatik.

Zerga progresibitateari lotuta, berriz, Goenagak azaldu zuen bizimoduaren garestitzeak ez diela modu berean eragiten herritar guztiei. “Progresitate fiskalarekin, karga fiskala gutxitzen zaie diru sarrera edo eros ahalmen gutxien duten herritarrei. Hori bermatzeko, hainbat hobari ditu Azpeitiko Udalak, diru sarreren arabera aplikatzen direnak. Orain arte dauden hobariak bere horretan mantenduko dira”. Hobariez gain, Gizarte Zerbitzuen bidez kudeatzen diren beste udal laguntza batzuk ere badituzte eskura egoera ekonomiko zaurgarrian dauden herritarrek.

Europatik datorren agindua

Zergak, tasak eta prezio publikoak %3 igoko badira ere, bi salbuespen daude: zaborraren tasa eta kiroldegiko eta igerilekuko zerbitzuen tasa.

Europako legeen arabera, zaborren bilketa, garraioa eta tratamendua % 100ean finantzatu behar dute udalek: zerbitzuak ezin du defizitarioa izan. Ondorioz, zaborraren tasa %28 igoko du Azpeitiko Udalak. “Etxe batean, batez beste, urteko tasa 124 euro da gaur egun, eta 2025. urtean 158,72 euro izango da, hau da, 34 euroko igoera izango da”, azaldu zuen Goenagak.

Igerilekuko eta kiroldegiko zerbitzuetan, %10ekoa izango da igoera. “Norbanakoei hilean 16,79 eurotik 18,47 eurora igoko zaie kuota, eta familia kuotak dituztenei 26,10 eurotik 28,71 eurora”. Igoeraren arrazoiak aipatu zituen zinegotziak: “Kirol monitoreek, urte askoan izoztuta izan ostean, soldata igoerak lortu dituzte sektoreko lan hitzarmenean, guk uste dugu beren lan baldintzetan lorpen handi bat izan dela, eta horrek eragin egiten digu guri ere zeharka, kostuen igoera bat dakarkigulako; horrez gain, 2025ean lehenago irekiko dira igerilekukoko instalazioak, 06:30ean hain zuzen, eta ordutegi zabalagoa izango dute; udako garaian ere, aurten bezala, denbora gehiagoz egongo da irekita kanpoko igerilekua”. Arrazoi horiek guztiek gastuen igoera bat eragingo diote udalari.

Bukatzeko, Goenagak adierazi du “kalitatezko zerbitzu eta baliabideak eskaintzen jarraitzea” dela Azpeitiko Udalaren lehentasuna. “Horretarako beharrezkoa da zerga, tasa eta prezio publikoetan proposatutako igoera horiek egitea”.