25 urte, kirolariei eta boluntarioei aitortza egiten

2000. urteaz geroztik, urtero banatu ditu Kirol Sariak Azpeitiko Udalak, Kirol Mahairekin elkarlanean (2020an salbu, COVIDagatik). Aurtengo ekitaldia atzo iluntzean egin zuen, eta herriko hainbat kirolari eta boluntariok jaso zuten aitortza.

Hauek izan ziren saritu nagusiak:

• Urteko Boluntarioa: Stephanie Thurman (Iraurgi Saskibaloi Taldea, alabak hartu zuen saria). “Hamar urte baino gehiago zuzendaritzan eta egunerokotasuneko lanetan laguntzen. Bere lana beharrezkoa izan da kluba 50. urteurrenera dagoen egoeran iristeko. Ohikoa da lehen taldeetako partiduetako sarrera-kudeaketa lanetan edo ISBk antolatutako ekitaldietan ikustea. Sthepanie XXI. mendeko ISBren etapako boluntariorik nabarmenenetakoa eta langile nekaezina izan da. Beti laguntzeko prest”, zioen haren hautagaitzak.
• Urteko Kirolari Gizonezkoa: Peio Ziarsolo (Lagun Onak Mendi Bazkuna). “Euskal Herriko Kopa-Trail jubenil mailan, azpitxapeldun; Santa Barbara Igoeran, absolutu mailan, 3. postua, eta jubenil mailan, 1.postua; Flish-Trail motzean, absolutu mailan, 3. postua; Espaniako Kopako lasterketan (jubenil mailan); 1.postua (Igualeja-Malaga); Espaniako Kopa CMX jubenil mailan, 3.postua”.
• Urteko Kirola Emakumezkoa: Laia Elortza (Izarraitz Igeri Elkartea). “Estatu mailako txapelketan finalista izan zen 50 bular proban. Egunerokotasuneko entrenamenduetan lanean finfin aritzearen adibide dugu, eta horrek emaitza bikain hau lortzera eraman du”.

Horiez gain, klubek eta herritarrek proposatutako dozenaka kirolarik jaso zituzten sariak, urteko boluntarioa, urteko kirolari gizonezkoa eta urteko kirolari emakumezkoa modalitateetan.

25. urteurrena medio, berezia izan zen aurtengo ekitaldia, eta oroigarri bana jaso zuten Koldo Aldalurrek eta Mikel Sanjuanek ere. Aldalurrek urte batean ez beste guztietan aurkeztu ditu kirol sariak, eta Sanjuanek urtero egin ditu sariak. 25 urte hauetan banatutakoekin erakusketa bat ere jarri zuen Sanagustinen.