26,7 milioi euroko aurrekontua, kalitatezko zerbitzu publikoak eskaintzen jarraitzeko

Herritar guztiei kalitatezko zerbitzu publikoak eskaintzen jarraitzea izango da udalaren erronka 2025erako, eta 26,7 milioi euroko aurrekontua izango du horretarako, aurten baino %5 handiagoa. Aurrekontu bateratua, Azpeitia Berritzen ere kontuan hartzen duena, 27,5 milioikoa izango da (+%3).

Atzo egindako ezohiko udalbatzarrean onartu zituzten datorren urteko diru partidak, EH Bilduko zinegotzien aldeko botoarekin eta EAJkoen abstentzioarekin. Leire Goenaga Ogasun batzordeburuak eman zituen xehetasunak. Lehentasun baten bueltan ardaztu direla aurrekontuak esan zuen: “Herritar guztien ongizatea eta bizi kalitatea hobetzen jarraitzea”.Nahiz eta aurrekontuetan zenbakiak izaten diren nagusi, “zenbaki hotz horien atzean” dagoenari erreparatzeko beharra nabarmendu zuen, “zenbakien mugimenduek eragin handia dutelako pertsonengan”. 

Herritarren beharretara egokitutako zerbitzuak

“Harro egoteko moduko zerbitzuak ditugu Azpeitian, azken urteetan zerbitzuen aldeko apustu handia egin delako”, azaldu zuen Ogasun batzordeburuak. Gazteriako zerbitzuak, aholkularitza zerbitzuak, kirol zerbitzuak, Emakume Txokokoak eta abar aipatu zituen.

Horri lotuta, ideia bat nabarmendu zuen. “Zerbitzu onak nahi baditugu, ezinbestekoa da zerbitzuak eguneratzea eta herritarren beharretara egokitzea, eta baita zerbitzu horiek emango dituzten langileak kontratatzea ere. Horregatik, giza baliabideetan %9ko igoera izango dugu”.

Gizarte Zerbitzuen Saila da azken urteetan igoera handiena izan duen sailetako bat. Sail horren barruan, aipagarria da 900.000 euroko aurrekontua izango duela etxez etxeko zerbitzuak, aurten baino 100.000 handiagoa. Herritarren ongizate emozionala zaintzeko jarri diren zerbitzuei (18 urtetik gorakoen psikologoa, nerabe eta familiena…) ere eutsi egingo zaie.

Gazteria Sailak 200.000 euro gehiagoko aurrekontua izango du (igande arratsaldetako aisialdia, kontziliazioari begira ere hain interesgarriak diren oporretako ekintzak, Gaztelekua eta ludotekak…). Emakume Txokoaren aurrekontua ere 50.000 euro handiagoa izango da. Kirolak indar handia du herrian, eta 250.000 euro gehiago jarri dira kontratazio berrian, beteak beste, langileen baldintzak eta igerilekuko zerbitzuak hobetzeko.

Herritarren bizimodua errazte aldera jarritako aholkularitza zerbitzuak ere garrantzitsuak dira udalarentzat (energia eta etxebizitza bulegoak…). Horrez gain, herri mailako zaintza plan bat egiteko partida bat ere sortu du 2025erako, eta kulturartekotasunaren plan integralarekin ere jarraituko du.

Udaltzainen lantaldea ere handitu egingo du segurtasuna bermatzeko, eta zerbitzu orokorretan ere langile gehiago kontratatuko dira (garbitasuna, txukuntasuna…).

Tokiko ekonomiaren garapena eta trantsizio energetikoa

Herriko eragile ekonomikoen ondoan jarraituko du udalak, eta azken urteotan bezala, 400.000 euro bideratuko ditu tokiko ekonomia lehiakor eta berritzailea sustatzeko laguntzetara. Iraurgi Berritzeni ere 437.000 euroko ekarpena egingo dio, tokiko ekonomia, enplegua eta turismoa bultzatzeko. Lehen sektorea indartzearen alde ere jarraituko du, azoka plaza, Elikagunea, Amillubi eta beste hainbat proiektu sustatuz.

Herri jasangarriago bat lortu ahal izateko, berriz, ingurumen, mugikortasun eta energia alorretako hainbat proiektu daude 2025eko aurrekontuetan: eremu publikotik harago, ikastetxeetan eguzki plakak jartzeko proiektua; LED sistemako argiteriara aldatzeko plana; birkarga puntu berriak; bidegorriaren hedapena Sanjuandegi eta Landetakoak lotzeko; aparkaleku itxiak bizikletentzat; herri autobus bat jartzeari buruzko azterketa…

Bizigarritasuna eta inbertsioak

Etxebizitzaren gaia kezka iturri da herritarrentzat, eta horri lotuta, etxebizitza planean adostutako neurriekin lanean jarraituko du udalak. Etxebizitza hutsak merkaturatzeko ahalegin berezia egingo du datorren urtean, eta horretarako, 100.000 euroko laguntza bat ere onartu du aurrekontuetan. Alde Zaharrean eraikin zaharrak erosi eta berriak eraikitzen jarraituko du, Azpeitia Berritzenekin eta Eusko Jaurlaritzarekin elkarlanean.

Inbertsioetan honako hauek dira aipagarrienetako batzuk: Etxe Alaiko urbanizazioren bigarren fasea (275.000 euro), herri bideak eta urbanizazio lanak (250.000 euro), Udaltzaingoaren eraikin berria (280.000 euro), musika eskolaren lehengo eraikina botatzea, Goikokale 2 eraikina eraistea, Uztaro ondoko berdegunea… Beste zenbait lan apiriletik aurrera egingo dira, gerakina erabiliz.

Zuhurtziaren eredu

Goenagak azpimarratu du zuhurtziaz prestatutako aurrekontuak izan direla. “Zuhurtzia eskatzen diguzue, eta guk aspalditik dakigu zer den zuhurtziaz jokatzea, horren adierazle da Azpeitiko Udalaren gaur egungo egoera finantzarioa, azken urteetako kudeaketa onari esker lortu dena”.

Udalak %5eko igoera izan du 2025eko diru sarreren aurreikuspenetan, ordenantza fiskaletan egindako igoerei eta beste zenbait dirulaguntzen lortzeari esker batez ere, izan ere, aldunditik jasotzen duen udal finantzaketarako foru funtsetik aurreikusi baino gutxiago jaso du 2024ean (455.914 gutxiago jasoko dugu) eta 2025erako %2ko igoera izatea espero da.

Gastuak igotzen ari direla ere esan zuen Goenagak. “Gastuen igoerak asko eragin du aurrekontuetan: igoerak zerbitzu eta kontratuetan, lan baldintzen hobekuntza... Inflazioa izan da beste gakoetako bat, adibidez, pandemia aurretik gaur egunera %40ko igoera izan dute obrek”.

Elkarlanean prestatutako aurrekontuak

Aurrekontuan osatzeko prozesuari berari ere eman dio garrantzia Ogasun batzordeburuak. Azaroan zehar hainbat batzar, bilera eta elkarrizketa izan dituzte udal ordezkariek auzoz auzo, sailez sail eta arloz arlo, proposamenak, asmoak eta ideiak jaso eta partekatzeko. “Asko eskertzen da proposamenak eta idea berriak jasotzea, ezinbestekoa da entzutea, eta entzuteko beharrezkoa da gerturatzea, horretan saiatu gara. Entzundako eta irakurritako guztiari erantzuten ere saiatuko gara”.

*Aurtengo aurrekontuak eta iazkoak ez dira guztiz parekagarriak. Izan ere, urte amaieran desegingo dira euskara eta kirol patronatuak, eta horien aurrekontua udalean txertatuko da.