Agenda 30aren baitan, elkarlanean aritzeko konpromisoa

20. ikasturtez, Agenda30 egitasmoa eraman da aurrera eta herriko ikastetxeetako haur eta gaztetxoak udaletxean izan dira udal ordezkariei beren lanketaren berri ematen. Aurtengoan, lehen edizioan egin gisa energia izan dute aztergai. Horretarako metodologia aldaketa garrantzitsua egin dute, eta, udal ordezkariei aurreko ikasturteetan egin bezala eskaerak egin beharrean, elkarlanerako proposamenak eta energia kontsumoa gutxitzeko konpromisoen berri eman dizkiete. 

Agenda 30aren baitan, aurten ere herriko ikastetxeetako haur eta gaztetxoak udaletxean izan dira. Ohi bezala, udal ordezkariekin bildu dira; Nagore Alkorta alkatearekin eta Aitor BereziartuaIngurumen zinegotziarekin. Aurtengoan Agenda 30 heziketa programaren 20. urteurrena da eta horren bueltan, ikasturtean zehar erabiltzen den lanketarako metodologia ere aldatu egin dute. Hala, aurtengoan, udaletxeari ekaerak egin beharrean, beraien konpromisoak azaldu eta datorren urterako elkarlanerako proposamenek luzatu zizkieten udalari. 

Hartutako konpromisoen artean daude: eguzkia dagoenean, argiak itzalita edukitzea; berogailuak piztuta badaude, ateak eta leihoak ixtea; ibilbide laburrak oinez edo bizikletaz egitea; ordenagailuarekin edo mugikorrarekin bagaude telebista itzaltzea eta dutxan denbora gutxiago egotea.

Datorren ikasturtera begira ere gaian sakontzen joan eta udalak eta ikastetxeek elkarlanean hainabt ekintza egitea proposatu diete udalari ikasleek. Honakoak izan dira proposamenak: 

1. Udal igerilekuan energiaren kontsumoa murrizteko eta berriztagarriak sustatzeko Udalak hartu dituen neurriak herritarrekin partekatzeko informazio-sentsibilizazio kanpaina diseinatu eta gauzatzea.

"Igerilekuak aztertzeko ikasleok Ekoetxean egin ditugun saioetan ikasi dugu Azpeitiko igerilekua trantsizio energetikoaren adibide eredugarria dela, izan ere, energia gehien kontsumitzen duen eraikina bada ere, Udalak neurri garrantzitsuak hartu ditu bertan", zehaztu dute. Hala, energia berriztagarriak sustatzeko plaka fotovoltaikoak teilatuan eta Barrenetxeko ur-termalen aprobetxamendua geotermia sistemaren bidez egiten dela aztertu dute. Horretaz gain, energiaren kontsumoa murrizteko gasolioaren ordez gasa erabiltzen hasi eta igerileku handiko sakonera murriztu, argiztapenerako sentsoreak eta LED argiak jarri, isolamendurako neurriak hartu eta energia eta uren monitorizazioa aztertu dituzte. 

2.Argirik gabeko jolasak antolatuko dituzte ikastetxe guztiei banatzeko.

Ikastetxe guztietan egindako jolasak denon artean partekatu Gailu elektronikoak gutxiago erabiltzeko, beste era bateko jolasak bilduko dituzte ikastetxeen artean partekatu eta praktikan ipintzeko.

3.  Herriko puntu beltzen eta gehiegi argiztatutakoen mapa egitea ondoren neurriak hartzeko.

Kaleko argiteria aztertu dutenean hainbat leku gutxi argiztatuta daudela eta beste batzuk gehiegi ohartu dira. Lehenengoari dagokionez, iaz berdintasun sailak iaz azterketa bat burutu zuen eta Agenda 30eko ikasleak beraiek egindako azterketaren ekarpenak partekatzeko prest daude. 

4.  Mugikortasun astea antolatuko dute (urtero edo bi urtetik behin).

Aste horretan helburua izango da herritarrak oinez edota bizikletaz gehiago mugitzea. Horretarako, informazio kanpaina, lehiaketak… antolatuko dituzte Bizikletaren erabilera sustatzeko, biribilguneetan bizikletentzat bideak margotzea beharrezkoa ikusten dute Zelai-luze-n dagoen moduan.

5. Ikastetxean, teilatuan, plaka fotovoltaikoak jartzeak zer abantaila dituen eta nola funtzionatzen duten informatzeko aurkezpenak antolatuko dituzte

Guzti horretaz gain, ikasleek Azpeitiko erroten inguruan egindako lanaren emaitza partekatu nahi izan zuten udal ordezkariekin.  "Aurten EA2030ean energiaren gaia landu dugu eta konturatu gara energia berriztagarriak aintzinean ere erabiltzen zirela. Horren adibide dira udalerriko ur-errotak. Azpeitian guztira 21 ur-errota egon ziren eta horietatik bi oraindik martxan daude, Toberagile-errota edo Toalle-errota eta Igaraberri, hain zuzen ere. Aipatzekoa da Azpeitiko errotei buruzko lehenengo aipamena 1319. urteko dokumentuari dagokiola, bertan Enparan-errota aipatzen da". Ikasleek Azpeitiko errotak mapa batean kokatu dituzte eta egindako lanaren emaitza Nagore Alkorta alkateari eman zioten ekitaldiari bukaera emateko.