Alde Zaharreko etxeetan hainbat hobekuntza egiteko aukera emango duen plan berezia, indarrean

Jendaurrean egondako epean, alegaziorik ez du jaso Alde Zaharreko 1. hirigintza eremurako  plan bereziak. Asteartean egindako udalbatzarrean ere aho batez onartu zuten. Ondorioz, dagoeneko indarrean dago. Azpeitiko Udalaren webgunean kontsulta daiteke plan osoa.

Plan berezi horren bidez, auzotarren bizi baldintzak hobetu nahi izan ditu udalak. “Legegintzaldi honetan, Alde Zaharrari bultzada handi bat emateko asmoa dugu. Datozen asteotan aurkeztuko ditugu martxan ditugun eta martxan jarri nahi ditugun neurriak. Horietako bat da plan berezi hau”, adierazi du Nagore Alkorta alkateak.

Hain zuzen ere, onartu berri den plan bereziari esker, beren etxeetan hainbat hobekuntza egin ahal izango dituzte bizilagunek. Besteak beste, eta betiere baldintzak betez gero, aukera hauek izango dituzte: teilatupeetan etxebizitzak egiteko aukera, teilatuetan terrazak ateratzekoa, etxebizitza handi batetik bi etxe ateratzeko aukera, balkoiak ateratzeko aukera…