Alde Zaharreko topagunearen proiektua, Hirigintzako Herri arteko Foroan

Oinherrik eta Hiritik At-ek antolatuta, Hirigintzako Herri Arteko Foroa egin zuten atzo goizean Donostiako Tabakaleran. Euskal Herriko zenbait herrik hirigintzako hainbat proiekturi buruzko beren esperientziak kontatzeko aukera izan zuten; besteak beste, Azpeitiak. Ander Larrañaga zinegotziak eta Edurne Korta Hezkuntza teknikariak Alde Zaharreko topagunearen (Frontoi Txiki ondoko eremua) proiektuaren berri eman zuten.

Hain zuzen, saio horretan, proiektua nola diseinatu zen, zer helburu izan dituen, prozesua bera nola gauzatu den, zer emaitza atera diren abar kontatu zuten. Iazko maiatzetik abendura bitartean gauzatu zen Alde Zaharreko topagunea diseinatzeko parte-hartze prozesua: maiatzetik uztailera bitartean egin zen parte-hartze proiektuaren diseinua, eta irailetik aurrera parte-hartze saioak (elkarrizketak, osagarritze saioak, deboluzioa…). Espazioaren eraldaketa aurten egitea aurreikusten da.

Azpeitiko ordezkariek ez ezik, Sopelako, Lezoko, Elgoibarko eta Markina-Xemeingo ordezkariek ere parte hartu zuten Hirigintzako Herri arteko Foroan.