Ardura banaketaren eta aurrera begirako erronken berri eman die Udal Gobernuak eragileei

Atzo arratsean, 19:00etan hasita, Udal Gobernuak zinegotzien, karguen zein datorren agintaldiko erronken aurezpena egin zuen eragileen aurrean. 50 lagunetik gora elkartu ziren hitzordura, eta arretaz entzun zituzten azalpenak. Ostean, mokadu baten bueltan elkar ezagutu eta hitz egiteko aukera izan zuten bertaratutakoek.

Nagore Alkorta alkateak hartu zuen hitza bileraren hasieran, aurkezpenak egin eta aurrera begirako erronken berri emateko. Maiatzaren 28an egindako hauteskundeetan Euskal Herria Bilduk jaso zituen boto gehien Azpeitian eta ekainaren 17an karguak hartuta EH Bilduk 10 zinegotzi eta EAJtak 7 izango ditu datozen 4 urteotan. Behin karguak hartuta, aste honetan bertan, ardurak banatzeko plenoa egin du udalak, eta atzokoan jakinarazi zituzten Udal Gobernuko 10 zinegotzietako bakoitzak zein ardura izango dituen.

Hitzartzearen hasieran Alkortak eragileek egiten duten lana eskertu nahi izan zien: “ Egiten duzuen iñurri lan hori errekonozitzeko aprobetxatu nahi dugu momentu hau. Zuen lanik gabe, Azpeitia ez zelako gaur dugun bezalakoa izango”, adierazi zuen. “Azpeitian beti dago zerbait, beti ari da norbait zer egin pentsatzen, nola lagundu irudikatzen. Eta hori, zuei esker da, ehundaka lagun zabiltzate herrigintzan lanean; kulturan, euskaran, kirolean, ikastetxeetan, hezkuntzan, arlo sozialean… aberatsak gara herri mugimenduan, eta aberatsak elkarlanean”.

Aurrera begira, orain arteko bidean “sakondu eta salto bat ematea” nahi dutela azaldu zuen. Egindako lana oinarri hartuta eta parte hartzean eta egiteko moduetan, elkarlanean, hobetzea. Azpeitiarrak erdigunean jarrita eta azpeitiar guztientzat gobernatuko dutela ere azpimarratu nahi izan zuen.

Herri duinagoa, aktiboagoa, iraunkorragoa, bizigarriagoa eta errotuagoa egitea izango dute erronka. “Inor atzean utzi gabe, herritar guztien beharrak kontuan izanda aurrera egingo duena osatzeko lan egingo dugu”: Bide horretan, gizartearen zahartzeak dagoeneko dakartzan erronkak izan ditu hizketagai. Bide horretan, etxez etxeko zerbitzua eta eguneko zentroa hobetzea, adinekoentzat Perdillegin egingo den zentro berria eta osasun mentaleko arazoei aurre egiteko programa prebentiboa martxan jartzeko lan egingo duela azaldu du, besteak beste.

Azpeitiak bertan bizi eta lan egiteko aukerak eskaintzeko aukerak sortzea ere aipatu zuen. Horretarako, “lan duina sortzeko helburuz” lur industrialak eskuratu eta birgaitzen ari direla azaldu zuen. Alde batetik, azken urteotan geldirik egon den Larringo industriagunea aktibatzea lortu dela eta Landetan zaharkituen dagoen eremua birgaitu eta enpresentzako erakargarri bihurtzeko neurriak hartzen ari dira.

Herri iraunkorragoa izatea ere erronka nagusia izango da. “Gero eta nabariagoa da krisi klimatiko edo ekologiko batean gaudela. CO2 isurien odorioz, planeta berotzen ari da, eta biodibertsitate galera handia izaten ari gara. Erregai fosiletan oinarritutako sistema hau oinarritik aldatu behar dugu. Azpeitian, azken urteotan hasiak gara pausoak ematen, baina bide horretan eraldaketa sakonerako urratsak eman behar ditugu. Horretarako, herritarrak eta herri eragileak trantsizio ekologikoaren elkarrizketan eta dinamikan inplikatzeko, Ingurumen Mahaia sortuko dugu”, zehaztu zuen.

Herri bizigarriagoa bat egiteko helburuz, etxebizitza politikan eragin nahi dute: “Etxebizitza politika eraldatzaileak egiten jarraituko dugu. Azpeitian bertan bizi nahi duten herritar guztiei horretarako aukera eskaintzea dugu helburu; etxebizitza edukitzea oinarrizko eskubide bat delako”. Horretarako tresna Etxebizitza bulegoa izango da. Eta, bukatzeko, Herri errotuagoa egiteko baloreak izan zituen ardatz: “Herri feminista, parte hartzailea, euskalduna, anitza, ingurumenarekin konprometitua eta kultur ondarea baloratu eta transmititzen duena izatera heldu nahi dugu. Horretarako herri hezitzailearen balioak modu praktikoan eta arloz arlo landu nahi ditugu”. Kirolean, kulturan eta euskara arloko dinamiken inguruan ere aritu zen.

Ardura berriak
Ondoren, zinegotziek banan bana hartu zuten hitza eta aurkezpenean beren ardura berrien berri eman zuten. Leire Goenaga izan zen hitza hartzen lehena. Goenaga Ogasuna, barne antolaketa eta Langileria batzordeburua eta Gizarte beharrak eta parekidetasun batzordeburua izango da, besteak beste. Joanes Amenabar Ingurugiroa eta auzoak batzordearen ardura izango du, hirigintzako energia eta hainbat obren arduraduna eta Urola Erdiko Mankomunitateko ordezkaria ere izango da. Ander Larrañaga ekonomia batzordeburua eta Amenabarrekin batera Zerbitzu orokorrak eta hirigintzako hainbat obren arduradura ere izango du. Leire Sarasua Festak, gazteria eta hezkuntza batzordeko kidea izango da eta hezkuntzako arduraduna izango da. Mikel Odriozolak Festak, gazteria eta hezkuntza batzordeburua izaten jarraituko du eta horretaz gain, Udaltzaingoa, etxebizitza eta udal eraikinen arduradura ere izango du. Ion Oteiza Kiroletako batzordeburua izango da eta Aitor Larrañaga Kultura eta Euskarakoa. Atzokoko zitan ezin izan zuten egon Idurre Zabaleta eta Miren Arrietak baina biak Gizarte beharrak eta parekidetasun batzordeko kideak izango dira.