Aste honetan bertan hasiko dira Esklabetako zuzkidura etxeetako giltzak entregatzen

Nagore Alkorta Azpeitiko alkatea eta Joanes Amenabar zinegotzia Esklabetako zuzkidura etxeak ezagutzen izan dira, gaur goizean, Denis Itxaso Eusko Jaurlaritzako Etxebizitza eta Hiri Agendako sailburuarekin eta Alokabideko eta Jaurlaritzako ordezkariekin batera. Guztira 48 zuzkidura etxe egin dituzte Esklabetako ekialdeko hegalean. Udalak doan laga dio eraikina Jaurlaritzari, eta hark sei milioi euroko inbertsioa egin du.

Apartamentu guztiak 36 urtetik beherako gazteei esleituko zaizkie, eta ordaindu beharreko alokairua beren diru-sarrera haztatuen arabera kalkulatu da: gehienez sarrera horien %30 ordaindu beharko dute. Bost urterako esleituko dira etxeak.

Alkorta alkateak gazteek etxebizitza bat izateko dituzten arazoak ekarri ditu gogora. “Azpeitiko Udala bere esku dagoena egiten saiatzen den arren, zoritxarrez gure baliabideak ere mugatuak dira, eta arazoak hor jarraitzen du”. Alde horretatik, Esklabetako zuzkidura etxeen garrantzia nabarmendu du, bost urtean baldintza duinetan bizitzeko aukera izango dutelako herriko dozenaka gaztek. Etxeak Esklabetan egin izanari ere balioa eman dio, “hutsetik eraiki beharrean eta lur gehiago okupatu beharrean, hor zegoen eta azpeitiarrontzat ezaguna den eraikin batean egin dira etxeak, eta eraikina bera babesteko aukera ere emango dute etxeek”.

Itxaso Etxebizitza eta Hiri Agendako sailburuak, berriz, azpimarratu du garrantzitsua dela “gazteen etxebizitza-eskubidea gauzatzeko behar diren baliabideak aktibatzea, aldi baterako alokairuko zuzkidura-bizitokiena bezalako formula aitzindariak erabiliz”.

48 zuzkidura-bizitokien artean mugikortasun urri iraunkorra duten pertsonentzat egokitutako logela bateko bi apartamentu daude. Gainerako 46 bizitokietatik 29 logela bakarrekoak dira eta 17 bikoak. Apartamentuak komentuaren ekialdeko hegalean daude, 7.951 metro karratuko espazio batean, eta beheko, lehenengo eta bigarren solairuetan daude banatuta.

Apartamentu bat esleitu zaien pertsonak Etxebideren erregistroan, bai Azpeitian bai Urola Kostako eremu funtzionalean, inskribatuta dauden alokairuko etxebizitzen eskatzaileak dira, eta bete behar dituzten baldintzak dira titularretako bat behintzat Azpeitian erroldatuta egotea, 3.000 eta 42.315 euro bitarteko diru-sarrera haztatuak izatea eta jabetzako, azalera eskubideko edo gozamen-eskubideko etxebizitzarik ez izatea.