Astelehenean irekiko da Euskal Antzerki Topaketetarako kartelak aurkezteko epea
2025/05/02
Oraindik hilabete batzuk falta diren arren, Euskal Antzerki Topaketen 43. edizioa prestatzen hasita dago Azpeitiko Udala. Topaketak iragarriko dituen kartela aukeratzea izaten da lehen pausoetako bat, eta, ohi bezala, lehiaketa bat antolatuko du horretarako.
Kultura Sailean aurkeztu beharko dira lanak, maiatzaren 5etik 30era bitartean. Irabazleak 900 euroko saria izango du. Egile bakoitzak gehienez bi lan aurkeztu ahal izango ditu, eta jatorrizkoak, argitaratu gabeak eta beste inongo lehiaketatan saritu gabeak izan beharko dute.
Epaimahaia hiru adituk osatuko dute, eta honako irizpideak izango dituzte kontuan kartela baloratzeko: sormena, kalitate grafikoa nahiz plastikoa, deigarritasuna, eta erreproduzitzeko nahiz editatzeko erraztasuna. Lehiaketara aurkezten diren lan guztiekin erakusketa egingo da.