Aurkezpena eginda, festa giroaren intentsitatea gorantz
2025/01/16
Herritarren parte-hartzea izaten da sansebastianen bereizgarri nagusia. Aurten ere 1.500 danbor jotzaile baino gehiago aterako dira helduen danborradan, 31 taldetan banatuta. 22:00etan hasiko da.
Ohi bezala, Oñatzbideko Gastadoreak joango dira ibilbidea irekitzen, eta, haien atzetik, gainerako taldeak aterako dira, hurrenketa honetan: Basazabal, Ziripot, Landeta Egizale, Alkartasuna, Ollagorra, Loiolabide Zahar, Zulozabal, Loiolatxo, Itsasi, Harkaitza, Etxera, Arrantzaleak, Gure Ametsa, Ardozaleak, Iraurgi SBT, Mendizaleak, Barratsu, Zezenzaleak, Barrenetxea, Illunpe, Inpernue, Izarraitzpe, Perdillegi, Oilo Soro, Irrintzi, Txalintxo, Arauntza, Sanjuandegi, Izarraitz Txoko eta Zokoa.
Artetxe ondoko bidegurutzetik abiatuta, Goiko kalea, Plaza Nagusia, Done Jakue kalea, parrokia, Elizkalea, Enparan kalea, estazioko zubia, Ibaiondo kalea, Damaso Azkueko zubia, Perez Arregi plazatxoa, Erdikalea eta Plaza Txikia zeharkatuko dituzte danbor joleek. Gauerdirako elkartuko dira guztiak plazan, une horretan izango baita banderaren igoera, San Sebastian martxa entzuten den bitartean.
500 ume baino gehiago
Urtarrilaren 20an, astelehenean, umeak izango dira protagonista. 500 partaide baino gehiago aterako dira haurren danborradan, hamar taldetan banatuta. 12:30ean abiatuko dira, eta ordena hau izango dute: Iraurgi Zumalakarregi, Ikasberri Gipuzkoako tertzioa, Iraurgi mikeleteak, Karmelo Etxegarai Napoleon urdinak, Juan Antxieta musika eskola, Karmelo Etxegarai Bizkaiko tertzioa, Itsasi, Iraurgi ezpatadunak, Ikasberri sukaldariak eta Karmelo Etxegarai Napoleon gorriak.
Karroza ikusgarri batek itxiko du haurren danborrada. Aitor Expositok egin du, “Azpeitiko antzinako lanbideak” gaia ardatz hartuta, eta Iraurgi ikastetxekoei egokituko zaie karrozan joatea.
San Sebastian egunean bertan, banderaren jaitsieran, sei talde hauek parte hartuko dute: Zezenzaleak, Barrenetxea, Illunpe, Inpernue, Izarraitzpe eta Perdillegik. 23:15ean hasiko da danborrada.
Balkoitik ikusteko aukera
Aurreko urteetan bezala, banderaren igoera eta jaitsiera udaletxeko balkoitik ikusteko aukera eskainiko du udalak. Urtarrilaren 16an (10:00ak arte) amaituko da izena emateko epea. Horretarako, udalzozketak@azpeitia.eus helbidera idatzi edo 943 15 70 68 telefonora deitu behar da, eta izen-abizenak, kontakturako zenbaki bat eta zein egunetako zozketan (igoeran, jaitsieran edo bietan) parte hartu nahi den zehaztu behar da. Zortzi bikotek izango dute egun bakoitzean balkoira igotzeko aukera.
Festa parekideen alde
Jai eredu parekideen aldeko apustua egingo du udalak sansebastianetan, eta Danona da festie, danona da ardurie lelo nagusia aukeratu du beste behin ere. Horrez gain, sansebastianetara egokitutako mezuekin kartelak aterako ditu.
Aldaketak autobus zerbitzuan
Jaien eraginez, zenbait aldaketa izango dira autobus zerbitzuan. Urtarrilaren 20ean eta 26an, 16:30etik 18:30era, sokamuturra dela eta, anbulatorioko bi geltokiak bertan behera geldituko dira, eta Julian Elortza eta tren museoko geltokiak saihesbidera (Gau Argi aurrera) aldatuko dira.