Aurtengo erronka: errenta aitorpenen erdiak euskaraz izatea

Gaur hasi da errenta aitorpena egiteko kanpaina Gipuzkoan, eta, ohi bezala, Uemarekin elkarlanean, Azpeitiko Udalak aitorpenak euskaraz egitera bultzatu nahi ditu herritarrak. Erronka bat ere bota du: egiten diren aitorpenen erdiak euskaraz izatea lortzea. Iaz, 8.320 herritarrek egin zuten errenta aitorpena, eta horietatik %46,2 izan ziren euskaraz.

Errenta aitorpenaren modalitate guztietan aukera daiteke euskaraz egitea: Internet bidez, telefonoz, banketxean edo aholkularitza bidez. Jarraitu beharreko urratsak zein diren azaldu du Uemak:

• Autolikidazio proposamena:

Jasotako proposamena onartzerakoan, telefonoz zein Internet bidez, euskaraz egin nahi duzula esan, eta aurrerantzean ogasunak agiriak euskaraz bidaliko dizkizu.

• Mekanizatua:

Hitzordua hartzerakoan, adierazi harremana euskaraz izan nahi duzula. Horrela eskatuz gero, Ogasunarekin harremana euskaraz izan dezakezu, bai aurrez aurre, bai telefonoz zein Internet bidez ere. Ogasunak sinatzeko ematen dizun orria ere euskaraz jaso dezakezu.

• Internet bidez:

Errenta programaren euskarazko bertsioa jaitsi Internet bidez eta hobetsitako hizkuntzaren atalean euskara aukeratu.

Aholkularitza zerbitzuren bat aukeratuz gero espresuki adierazi beharko duzu euskaraz egin nahi duzula. Beste eraren batera egiten baduzu ere (finantza erakunderen baten bidez...), euskaraz egiteko eska dezakezu.