Azaroaren 18rako eman behar da izena gizonen desboteretze tailerreko lehen saiorako

Azpeitiko Emakumeen Txokoak aurtengo ikasturterako prestatutako eskaintzaren barruan, gizonentzako desboteretze tailerra da berrikuntzetako bat. Hiru saioko tailerra izango da, eta azaroaren 22an izango da horietako lehena. Lehen saio horretan parte hartu nahi dutenek azaroaren 18rako eman behar dute izena, Emakumeen Txokoan bertan edo 688 751 000 zenbakira deituta. Doakoa da, eta gizonek bakarrik parte hartu ahal izango dute.

Gizonentzako desboteretze-eskolak genero-rol tradizionalei aurre egiteko guneak dira. Tailerrak eta eztabaidak eskaintzen dituzte, gizonek gizartean duten eginkizunari buruz hausnar dezaten eta genero-desberdintasunak zein indarkeria matxistak betikotzen dituzten portaerak desikas ditzaten. Gizon kontzienteagoak sortzea bilatzen dute, harreman parekideak eta indarkeriarik gabekoak sustatuz.

Ikasturte honetako hiru formakuntzak

1. Oinarri teorikoak eta kontzeptuak argitzen. Azaroak 22 (ostirala), 17:00etatik 20:30era.
Feminismoak errealitate, teoria, kontzeptu eta hitz ezberdinak jarri ditu mahai gainean, eta batzuk ezagutzen ditugun arren, berriagoak zaizkigu beste batzuk. Lanketa indibidual zein kolektiboa egiteko, ezinbestekoa da lehenik oinarri teorikoetan sakontzea -hausnartzea-, ibilbidea aterki berdinaren azpian abiatzeko.

2. Gizonek feminismoarekiko duten ardura. Otsailak 21 (ostirala), 17:00etatik 20:30era.
Beldur, ezjakintasun edo erosotasunagatik, feminista moduan haien burua izendatzen duten gizon askok ez dute agian nahikoa aurrerapauso eman. Hori honela, gizarte feminista eraikitzera bidean, gizonek hartu beharreko konpromisoez jardungo dugu.

3. Desira, erotika eta heteroaraua. Maiatzak 23 (ostirala), 17:00etatik 20:30era.
Lehentasunek eta desirek gurutzatu egiten dituzte pertsonen espektatiba eta munduan egoteko moduak. Gai tabua izan denez, ordea, ez da nahikoa hitz egiten horiek heteroarauaren eraikuntzan eta botere-harremanetan duten pisuaz eta, horregatik, horien inguruan hitz egiten hasteko espazioa izango da.

Saioak Iñi Etxezarreta Tocak, Eihera elkarteko kidea, bideratuko ditu. Azpeitiko Emakumeen Txokoan izango dira.