Itzulpen automatikoa / Machine translation

Azaroaren 6an ekingo die udalak aurrekontuak osatzeko auzoz auzoko bilerei

2024/10/31
Azaroaren 6an ekingo die udalak aurrekontuak osatzeko auzoz auzoko bilerei

Aurrekontuak eta parte-hartzea elkarri lotuta doaz Azpeitian. Azken urteotako ohiturari eutsiz, aurten ere bilerak egingo ditu udalak erdigunetik kanpoko auzoetan bizi direnekin eta Alde Zaharrekoekin.


Horrez gain, beste bi bide bide izango dituzte herritarrek ekarpenak egiteko: alde batetik, postontziak egongo dira herriko hainbat puntutan; bestetik, www.azpeitia.eus/gardentasuna/iradokizunak-gardentasuna helbidera idazteko aukera egongo da.

Aurrez aurreko hamar bilera egingo dituzte guztira udal ordezkariek: Aratz Errekan, Loiolan, Urrestillan, Matxinbentan, Nuarben, Lasaon, Oñatzen, Elosiagan, Landetan eta Alde Zaharrean.Batzar horien bidez, aurrekontuei begira herritarrek zer lehentasun dituzten jakin nahi du udalak. Horrez gain, aurrekontuetatik harago, bestelako zer proposamen eta behar dituzten ere jasoko du. Era berean, esku artean dituen proiektuen gaineko informazioa emango die herritarrei.

Alde Zaharrean ere bai

Horri lotuta, erdigunetik kanpoko auzoetan ez ezik, beharrezko ikusi du Alde Zaharrean ere bilera antolatzea, auzoko egitasmoen gaineko informazio eguneratua emateko aurrez aurre (etxe berriak, trastelekuak, parte-hartze prozesua…).

Herritar guztiek jasoko dituzte etxean aurrekontu parte hartzaileei begira prestatutako eskuorriak. Ekarpenak idatzi ostean, postontziak egongo dira herriko sei puntutan (udaletxean, igerilekuan, liburutegian, Urrestillan, Jose Artetxe kalean eta Urbitarte auzoan) ekarpen horiek jasotzeko. Azaroaren 20an kenduko dituzte postontziak. Internet bidez ere egin ahal izango dira ekarpenak, helbide honetara idatzita: www.azpeitia.eus/gardentasuna/iradokizunak-gardentasuna

Herritarren ongizatean inbertitzen jarraitu nahi du Azpeitiko Udalak, kalitatezko zerbitzu publikoen eta azpiegitura egokien bidez. Horretarako, ezinbestekotzat du herritarren lehentasunen berri izatea. Elkarri entzun, eta elkarrekin aurrera egitea da helburua, azpeitiar guztion ekarpenekin, Azpeitia hobea egiteko.

Bileren egutegia:

• Azaroak 6. Alde Zaharra. Basazabalen, 19:00etan.
• Azaroak 6. Oñatz. Elizako lokalean, 19:00etan.
• Azaroak 6. Lasao. Auzo lokalean, 19:00etan.
• Azaroak 7. Loiola. Loiolako elkartean, 19:00etan.
• Azaroak 11. Aratz Erreka. Auzoko tabernan. 19:00etan.
• Azaroak 12. Elosiaga. Añotan, 19:00etan.
• Azaroak 12. Urrestilla. Auzo lokalean, 19:00etan.
• Azaroak 13. Matxinbenta. Taberna gaineko lokalean, 19:00etan.
• Azaroak 13. Nuarbe. Auzo lokalean, 19:00etan.
• Azaroak 14. Landeta. Kiroldegian, 19:00etan.