Azken egunak, udako ikastarorako deskontuaz baliatzeko

Azpeitiko Udalak herritarren zaintza emozionalean egiten ari den lanketa azaltzeko aukera izango du EHUren udako ikastaroetan. Uztailaren 16an eta 17an izango da, Donostiako Miramar jauregian (online ere jarraitu ahal izango da).

Ongizate emozionalaren arloa lehentasunetako bat da udalarentzat, eta horren adibide dira azken boladan martxan jarri dituen hainbat zerbitzu. Adin tarte guztiak hartzen dituzte zerbitzu horiek: Gaztelekuko nerabeentzako eta familientzako orientazioa zerbitzu berrian, adibidez, psikologo batek hainbat gairi buruzko aholkularitza eskaintzen die gurasoei edo nerabeei, familiarteko harremanetan edo komunikazioan egon daitezkeen zailtasunei aurre egiteko edo nerabezaroan sor daitezkeen arazoetan laguntzeko; 18 urtetik gorakoek doako psikologo zerbitzua jaso dezakete, beren ondoez emozionalari aurre egiten saiatzeko; etxeko arreta integralean, psikologo batek laguntzen die adinekoi, adibidez, senti dezaketen bakardadea arintzeko.

Zerbitzu horiez gain, udaleko sailen eta herriko eragileen (anbulatorioa, ikastetxeak, Gaztelekua, Udaltzaingoa…) arteko elkarlanean ere aurrerapausoak eman dira; izan ere, prebentzioa eta koordinazioa dira, udalaren iritziz, zaintza emozionalaren ardatzak.

Udako ikastaroan, lanketa hori guztia azalduko du udaleko lantalde zabal batek. Lehen egunean, prebentzioaren eta koordinazioaren arloan egiten den lanketa izango da gai nagusia. Bigarrenean, berriz, nerabezaroari eskainiko zaio egitarau osoa.

25 urtetik beherakoek, doan

Matrikula egiteko bide arruntena EHUren webgunearen bidez da, uik.eus helbidetik. Zaintza emozionalerako eredu berritzaileak tokiko administrazioen ikuspegitik da izenburua. Hala ere, Azpeitian bizi direnentzat edo Azpeitiko anbulatorioan edo herriko ikastetxeren batean lan egiten dutenentzat prezio bereziak jarri ditu udalak. Horretarako, udalaren bidez egin behar da matrikula (https://labur.eus/noVNN), uztailaren 8a (astelehena) baino lehen. 25 urtetik gorakoek 20 euro ordaindu beharko dute eta hortik beherakoek doan izango dute. 20 orduren balio akademikoa izango du ikastaroak.

Informazio gehiago: https://www.uik.eus/eu/jarduera/zaintza-emozionalerako-eredu-berritzaileak-tokiko-administrazioen-ikuspegitik