Azoka Plaza dinamizatu eta herritarrak sentsibilizatzeko elkarlanean
2023/06/15
Bost urte bete dira aurten Azoka Plaza berritua ireki zenetik. Bost urte bertako produktuen plaza bilakatu zenetik. Urte hauetan hamaika azoka eta ekintza egin dira, baina aurrera begira azoka plazatik egiten den dinamizazio eta sentsibilizazioa indartzeko helburuan bat egin dute Azpeitiko Udalak eta Azoka Plazako Elikagunea kudeatzen duen Artxara Kooperatiba Txikiak.
Orain artean, ikastaroak, azoka bereziak zein hitzaldiak egin izan dira tarteka, baina aurrera begira, Azoka Plazaren filosofiaren oinarri hartuta gai desberdinen inguruko hitzaldi edo mahainguruak, produktuen sustapenerako aurkezpen eta dastaketak edo ikastaroak antolatuko dira. Horretarako, baliabideak indartuta eta Azpeitiko Udala Artxara Kooperatiba elkarlanean arituko dira.
Nagore Alkorta Azpeitiko alkateak Azoka Plazaren ibilbidean pauso garrantzitsua dela azpimarratu nahi izan du: “Bost urteko ibilbidean izugarrizko abiadura hartu du azokak. Egunerokoari heldu eta beste erronka batzuei heltzeko garaia dela uste dugu eta horretarako baliabideak jarriko ditu udalak”. Ekoizle, merkatari zein herritarrei zuzendutako ekintzak egitea adostu dute Artxararekin: “Formazioa eta sentsibilizazioa oinarri izanda ardatz desberdinetako gaietan sakonduko da, eta horrek azoka plaza zein herritarrak aberastuko ditu”. Bukatzeko, bost urte hauetan egindako ibilbidean egindako ana eskertu nahi izan die ekoizleei, herritarrei eta Elikaguneko kideei: “Azoka plaza zuek egiten duzue eta elkarrekin, indarrak batuta aurrera egiteko konpromisoa dugu guk”.
“Orain artean egin dugunarekin konformatu gabe, beste esparru batzuetan ere sakondu dezakegu Azoka Plazatik, eta laguntza honekin orain artean ekintza solte gisa egin ditugunetik abiatuta agenda oso eta osatua eskaintzea da”, azaldu du Ioritz Aizpuru Artxarako kideak. Herritarren sentsibilizazioa, ekoizle zein kontsumitzaileen formazioa eta bertako produktuen sustapena oinarri dituen agenda osatuko dute. Horretarako, herriko, eskualdeko eta Euskal Herriko eregile desberdinen arteko elkarlana sustatu eta bultzatuko dutela ere azpimarratu nahi izan du. Bukatzeko, udalari eskerrak eman nahi izan dizkio Azoka Plazaren bidez lehen sektorearen eta merkataritza txikiaren alde egiten duenagatik.