Azoka Plazaren bost urteko ibilbidea ekoizleen lana aitortuz eta eskertuz ospatu dute

Larunbatean ospatu zuten ekoizle, eragile eta herritarrek Azoka Plazaren 5. urteurrena. 2028ko otsailaren 3an inauguratu zen Azoka Plaza berritua eta data hori aintzat hartuta ibilbidea posible egin duten ekoizleen eta Elikagunearen lana aitortu eta eskertu nahi izan dute. Nagore Alkorta alkateak bere hitzartzean ekoizle eta baserritarrek duten garrantzia azpimarratu nahi izan zuen: "Guk gaur eta hemen ere eskertu nahi dizuegu Azpeitiko Azoka Plazaren alde egiten duzuen apustua eta hona etortzeko egiten duzuen lana. Guretzat azoken alde, azoka plazaren alde egitea, tokiko ekonomiaren, ingurumenaren eta jasangarritasunaren alde egitea da".

Otsailaren 3an, 5 urte bete ziren azoka plaza berritua inauguratu zenetik. Eraikina eta edukia berrituta, itxuraldatuta ekin zion etapa berriari Azoka plazak, eta egunez egun, bost urte bete ditu. Larunbatean, 12:00etan hasita ibilbidea gogoratzeko eta egunez egun bertan izaten diren ekoizle, berezo eta eragileei beren lana aitortu eta eskertzeko ekitaldia egin zen eta herritar ugari bildu zen ekitaldira. 

Eraikin zaharra eta gainbeheran zen azokak atzean utzi eta berritasun, indar, bultzada eta konpromisoz beteta hasi zuen ibilbidea eraikin berriak. Ibilbide luze baten atarian, "oinarri sendoak" jarri direla adierazi zuten. 
Eraikina eraberritu zen, eta horrekin batera baita azoka plazaren egiteko modu edo filosofia ere. Herriko ekoizle zein eragile desberdinen artean adostuta, azoka plazaren oinarrietara jotzea erabaki zen. Bertakoa eta garaikoa jarri zen ardatz.  Azpeitiko zein eskualdeko ekoizleon produktuen erakusleiho da azoka plaza.  Eta gertutasunerako, zuzeneko sal-erosketarako eta konfiantzarako gune bilakatu da. Non ekoiztutako elikagaiak jan "apustu eta hautu bat" dela azpimarratu nahi izan zuten eta gero eta azpeitiar gehiagok bertako eta garaiko produktuak kontsumitzearen alde egiten dutela gaineratu zuten.

Nagore Alkorta alkateak Azoka Plazaren lema ekarri zuen gogora: bertakoa elikatuz. "Bost urte, lehen sektorea elikatuz, dibertsifikazioa bultzatuz, tokikotasuna ardatz hartuz, ekonomia sustatuz, bertakoa eta garaikoa denaren kontsumoaren alde eginez. Eta azokak indarberrituz. Horixe baita gure oinarria, Azoka plaza honen esentzia. Azokak eta bertako eta garaiko produktuak. Eta oinarri berri horien baitan eraiki da guzti hau". 

Erreferentziazko gune bilakatu dela ere azaldu zuen, eta epealdi honetan asko izan dira bisitan azoka eta elikagunea ezagutzera etorri direnak: "Guk sortu dugu gurean ondo baino hobeto funtzionatzen duen eredua, azokak eta azoka plazara etortzen zareten ekoizleak ardatz hartuta. Lortu dugu puzzlearen piezak enkajatzea. Beti ez da erraza izaten, baina oraingoz, zati txikiak elkartuz osatzen dugu osotasuna. Honekin inork ez dezala pentsatu dena egina dagoenik! Oinarri sendoak jarri ditugu garai zailetan, baina hau hasieraren hasiera besterik ez dela argi dugu. Hasiera zailean, oinarri sendoa jarri dugu, baina etorkizun bat dugu irabazteko eta eraikitzeko" Azoka plaza ardatz hartuta bertako produktuen zabalpena eta kontsumoa handitzeko abian jarritako Azoka Plaza 2.0 proiektuaren bidez herriko jangela komunitarioetara banaketak egiten direla eta Enkarguek-en bidez, azoka plazako produktuak herriko etxean jasotzea errazten dela ere gogorarazi zuen. 

Azoka Plazaren egunerokoan duten garrantziagatik, astearte eta ostiraletan azokan egoten diren ekoizleei eta Elikaguneari egiten duten lana aitortu nahi izan zieten. Hala, banan bana deitu eta oroigarri bat eman zitzaien. 

Ekitaldiarako prestatutako bideoa