Azokara etortzen diren ekoizleek botako dute txupinazoa

Asteartero bezala, goizean goiz hasi dira beren postuak muntatzen azokara etortzen diren baserritarrak. Produktuak txukun-txukun jarri, eta gorabeherarik gabe joan dira lehen orduak. Hala ere, gaurkoa ez da astearte arrunt bat izan. Eguerdi aldera jakin dute, txupinazoa nork bota erabakitzeko bozketan, azokara etortzen diren ekoizleek jaso dituztela boto gehien.

Hogeita hamar ekoizle baino gehiago etorri ohi dira asteartetan azokara, Azpeititik bertatik erdiak inguru, eta inguruko eskualdeetatik gainerako gehienak. Ostiral arratsaldetan, berriz, hamarrek jartzen dute postua. Batik bat emakumeak aritzen dira salerosketan, eta gehienek urte asko daramatzate zeregin horretan.

Txupinazoa botatzeko hautagaien artean sartu zirela jakin zutenean, “sorpresa” hartu zutela kontatu dute. Bakarren batek esperantza bazuen arren, irabaziko zutenik ere ez zutela uste kontatu dute. “Zeresana behintzat eman digu kontuak. Gaur goizean ere hor ibili gara elkarri galdezka ea ba ote genekien ezer”.

Pozik parte hartzearekin

Azpeitiko Udalak lehen aldiz egin du partaidetza prozesu bat txupinazoa nork bota erabakitzeko. Balorazio ona egin du Mikel Odriozola Festa batzordeburuak. “Txupinazoa botatzeko aukera ematea aitortza bat egiteko modu bat da. Nahi genuen herritarrek esatea nori nahi zioten egin aitortza hori”.

Lehen fasean, hautagaiak proposatzeko fasean, hogei hautagai baino gehiago proposatu zituzten herritarrek. “Lanak izan genituen zerrenda laura murrizteko. Izan ere, kanpoan utzi behar izan genituenetako askok, bakoitzak bere arloan, lan handia egin dute herriaren edo herritarren alde”. Festa Batzordean dauden udal ordezkarien artean hartu zuten erabakia, eta Uztarria/Guka, azokara etortzen diren ekoizleak, Sierbetako mojak eta Elkar-ekin izan ziren hautatuak.

Hurrengo fasean, lau hautagairen artean bat aukeratzeko fasean, uste aldean handia izan da herritarren partaidetza. 702 pertsonak eman dute botoa, gehienek Internet bidez. “Lehen aldia izateko datu oso ona dela uste dugu. Saltsa pixka bat ere sortu du kontuak, lagunartean-eta hitz egin du jendeak txupinazoari buruz, eta hori ederra iruditzen zaigu”. Gainera, oso estu egon da bozketa. Azokara etortzen diren baserritarrek 2.094 boto jaso dituzte eta Sierbetako mojek 2.030. Uztarria/Gukarentzat 1.486 boto izan dira eta Elkar-ekinentzat 1.410.