Azpeitia dantzan jartzeko prest!

Azpeitia Dantzan hasiko da asteburuan eta dagoeneko prest dituzte ikuskizunak dantza elkarte eta eskolek. Urtero gisa, uda garaian, dantza izango da protagonista herrian. Itsasi eta Sahatsa euskal dantza taldeei eta Jose Mari Orbegozoren dantzaki eskolari, aurtengoen Luis Beltzaren eskolak, Juan Antxieta Musika eskola lagun duela antolatutako ikuskizuna gehitu zaie. Aurtengoan, beraz 4 dantza ikusizunez gozatzeko aukera izango da.

Aitor Larrañaga zinegotziak eskerrak eman nahi izan dizkie dantza elkarteei: “Urte osoan egiten duzuen inurri lanaren isla izango dira oraingo ikuskizun hauek. Dantzaren irakaskuntzan, transmisioan eta baita sorkuntzan ere aritzen zarete eta herriarentzat oso garrantzitsua da guzti hori. Horregatik egiten duten lana errekonozitu eta eskertu nahi diegu dantzaren bueltan diharduten eragile guztiei”.

Larunbatean, ekainaren 24ean, 19:00etan hasita, izango da Azpeitia Dantzaneko estreineko ikuskizuna. Hasiera, gainera, emanaldi berezi baten emango dio. Luis Alberdi Beltza-ren eskola 40. urteurrena ospatzen ari da eta Azpeitia Dantzanen parte hartzera animatu da. Osatutako ikuskizuna izango da ikusleen gozagarri. Dantzaldian lagun izango ditu Juan Antxieta Musika Eskolako kideak.

Uztailaren 2an, Sahatsa Taldeak Oi lur ikuskizuna eskainiko du 19:00etatik aurrera. Julian Barrenetxea abesbatza, azketa taldea, Lazkaoko kantata, Ormaiztegiko Urmaiz eta Donostiako Coral Aita Donostia abesbatzako kideak izango dira Sahatsaren bidelagun saioan zehar.

Uztailaren 9an, Jose Mari Orbegozoren Dantzaki dantza eskolako kideak taularatuko dira eta erritmo bizi eta alaiekin beteko dute Soreasu antzokia 19:00etatik aurrera.

Eta, aurtengo edizioari Itsasi Dantza taldeak emango dio bukaera uztailaren 16an, igandean euskal dantza tradizionalen emanaldiarekin.

Emanaldi guztiak Soreasu antzokian izango dira, 19:00etan hasita eta doakoak izango badira ere sarrerak hartu behar dira eta dagoeneko eskuragai daude Kulturazen webgunean.