'Azpeitia, elkarrekin bizi!' molde berriko etxebizitzak diseinatzeko prozesuko bilera izango da urriaren 1ean

Azpeitiko Udalak herritarren etxebizitza beharrari erantzuna emateko babestuta etxebizitzen eskaintza zabaldu asmoz, udaberrian ohiko etxebizitzaz gain molde berriko etxebizitzetan bizi nahi duten herritarrei zuzenduta 'Azpeitia, elkarrekin bizi' prozesu parte hartzailea jarri zuen abian. Uda aurretik prozesuko bi bilera egin ziren eta ikasturte berria hastearekin bat, datozen bi bileretako datak zehaztu dira.

Prozesuaren hirugarren eta laugarren bilerak urriaren 1ean eta 22an izango dira Basazalen, 18:30etatik aurrera. 

Prozesu honen helburua da, herrian dagoen molde berriko etxebizitzen eskaera edo beharrari erantzuna ematea. Horretarako hasieratik etxebizitzak diseinatu eta definitzeko prozesua da abian dagoena. Lehen bi bilerak bezala, Hiritik at elkarteak gidatuko ditu ondorengoak ere.

Parte hartze irekia

Molde berriko etxebizitzen diseinuan parte hartzeko 30 lagunetik gorak eman zuten izena, eta orain arteko dinamikako parte izan dira. Hala ere, oraindik parte hartu nahi dutenek badute horretarako aukera. Prozesuko parte izan nahi dutenek zuzenean bileran parte hartu dezakete, edo aurrez komunikazioa@azpeitia.eus helbidera idatzi dezakete prozesuaren nondik norakoez informatzeko.