'Azpeitia Zaindu' kanpainarekin bat eginez, bertako merkataritzaren aldeko apustua egin dute herritarrek

Azpeitiko Udalak eta Bertan-ek antolaturiko kanpainak arrakasta handia izan du eta ordu gutxitan agortu dira salmentara ateratako 3.000 erosketa bonoak, 150.000€ inpaktu ekonomikoa eraginez herriko saltokietan.

Herriko merkataritza eta ostalaritza sektoreetako kontsumoa aktibatzeko helburuarekin, kontsumitzaileei zuzenduriko erosketa bono kanpaina burutu dute Azpeitiko Udalak eta Bertan Azpeitiko Merkatarien Elkarteak. 'Azpeitia Zaindu' lemapean, herriko establezimenduetan erabili daitezkeen erosketa bonoak atera dituzte. Bono bakoitza 35€ren truke eskuratu zitekeen eta 50€ko kontsumo-balioa du kanpainara atxikitako establezimenduetan.

Pasa den astean, lehen 1.500 bonoak jarri ziren salgai eta denbora laburrean guztiak saldu ziren. Herritarren artean izandako harrera ona ikusirik, atzo beste 1.500 bono jarri ziren salgai eta horiek ere ordu gutxitan agortu ziren. Horrela, 3.000 bono jarri dira zirkulazioan, 150.000€ko kontsumoa sortuz herriko saltokietan.

Antolatzaileek, bai Azpeitiko Udalak zein Bertan Merkatari Elkarteak, oso modu positiboan baloratu dute ekimenak jasotako erantzuna. Herritarrek bonoak erosterako orduan arduraz jokatu dutela nabarmendu nahi izan dute; bai bonoak erosteko ilaretan eta baita bonoak erosterakoan ere. Horren adierazle dira datuak, izan ere, ia 800 pertsonek eskuratu dituzte bonoak eta, oro har, herritar gehienek bi lagunentzako bonoak eskuratu dituzte.

Herritarren erantzun apartak antolatzaileen aurreikuspen guztiak gainditu ditu. Merkatari Elkarteko Presidente den Karmele Zabaletak adierazi du “oso pozgarria” dela herritarrek izan duten jarrera, merkatariei “aurrera egiteko ilusioa eta indarra emateko” balio izango duena. Aldi berean, oso eskertuta adierazi da Udalarekin “eman duen laguntza guztiagatik”.
Nagore Alkorta alkateak, merkatari eta herritarrak eskertu nahi izan ditu “herrian inbertitzeko” erakutsitako konpromisoagatik: “Herria egiteko garaia da, eta gure erosketetan Azpeitian inbertitzea erabakitzen dugun bakoitzean etorkizuna osatzen ari gara, elkarlanean”.