Azpeitian, DBHko ikasleek ere izango dute A1 maila Ingura plataformaren bidez egiteko aukera

HABEk, Eusko Jaurlaritzaren Helduen Alfabetatze eta Berreuskalduntzerako Erakundeak, euskara online ikasteko eta irakasteko Ingura plataforma digitala jarri du abian. Aurten, A1 mailako ikastaroa eskaintzen du Ingurak. Nahiz eta HABEren jarduna 16 urtetik gorakoei zuzendua izan, Ingurako edukiak DBHkoentzako ere egokiak dira. Beraz, DBHkoei eskaintzeko aukeraz galdegin zuen euskaltegiak, eta baiezkoa jaso.

Etorkizun egitasmoaren bitartez, eta herriko ikastetxeekin elkarlanean, Azpeitiko Udal Euskaltegiak euskara erakusten die behar gehien duten ikasleei. Etorkizun egitasmoa osatzeko aproposa delakoan, Ingura eskaini die DBHko ikasleei. Aste honetan hasi dira lehenengo ikasleak Ingurako zereginak betetzen.

A1 mailako material hau dago Ingura plataforman.

• 60 egoera-bideo. (2-3 minutukoak) 4 hizkuntzatan azpititulatuta.
• 60 azalpen-bideo. (4-7 minutukoak) 4 hizkuntzatan azpititulatuta.
• Gela birtuala: tutorizazioa behar duten 120 jarduera. Taldean eta bakarka, modu sinkronoan nahiz asinkronoan egitekoak.
• 30 berrikusketa-jarduera.
• 200 item: mintzamena, idazmena, gramatika, hiztegia eta kultur edukiak lantzeko eta ebaluaziorako.

Ikas-plataforma horren bitartez, euskara edozein gailutatik, noiznahi eta nonahi eroso eta malgu ikasteko aukera eman nahi zaie ikasleei. Malgutasun hori bereziki garrantzitsua izan daiteke ikasturte erdian edo uda sasoian etortzen diren nerabeentzat, euskara ikasten hasi ahal izango dutelako edozein sasoitan.