Azpeitiko Udalaren gaitzespena, abenduaren 31n izandako genero-indarkeria kasuaren aurrean

Abenduaren 31an emakume batek jasandako genero indarkeriaren aurrean, Azpeitiko Udalak beste behin ere ozen adierazi nahi du gogor gaitzesten duela emakumeen kontrako indarkeria oro.

Horrelako gertaerarik ez dugu onartzen gure herrian, eta erakunde, elkarte eta herritarrok lanean jarraituko dugu emakumeok indarkeria matxistarik gabe bizi gaitezen.

Gure laguntza nahiz babes osoa adierazi nahi diogu erasoa jasan duen emakumeari eta bere ingurukoei. Udalak bere esku dituen informazio eta baliabide guztiak jarriko ditu erasoa jasandako emakumearen esku, baita bere onera etortzeko prozesuan behar izan dezakeen laguntza guztia ere.

Emakumeen aurkako indarkeria egiturazko arazoa da, emakumeak kontrolpean eta mendean mantendu nahi dituen sistema baten adierazpen argia. Indarkeria hori ez da ekintza isolatuen edo zorizko gertakarien emaitza; aitzitik, generoen inguruko aurreiritzi eta estereotipo errotuen ondorio zuzena da. Genero-indarkeria kasuak, hau da bikotekide edo bikotekide ohiengandik jasandako erasoak, emakumeen aurkako indarkeria lazgarrienetako bat dira, eta arazo horri aurre egiteko, ezinbestekoa da gizon eta emakumeen arteko berdintasunaren aldeko balioak sustatzea eta indartzea.

Azpeitiko Udalak berdintasun politikak garatzen jarraitzeko konpromisoa hartua du, gure bizikidetza oinarrien aurka doan gizarte-arazo bati erantzuna emateko. Horregatik, lanean jarraituko du herriko esparru eta gune ezberdinetan indarkeria matxistaren zantzurik txikiena errotik desagerrarazi arte.

Eraso oro gaitzestea, indarkeriari aurre egiten dioten emakumeei babesa ematea, prebentzio eta sentsibilizazio lanean jarraitzea eta baliabideak bideratzea dagokigu.

Gogoan izan erasoren baten aurrean honako telefonoetara dei dezakezula:

* Gizarte Zerbitzuak: 943157192
* Udaltzaingoa: 092 edo 943151313
* Emakumeen Txokoa: 688751000
* Ertzaintza: 112