Itzulpen automatikoa / Machine translation

Bakarrik bizi diren 65 urtetik gorako herritarren inguruko azterketa: sare sozial sendoa eduki arren, bakardade sentipena oso hedatua dago

2023/04/12
Bakarrik bizi diren 65 urtetik gorako herritarren inguruko azterketa: sare sozial sendoa eduki arren, bakardade sentipena oso hedatua dago

Biztanleriaren zahartzean ekarriko dituen erronkei aurre egiteko bidea lantzeko, azkeneko urteotan hainbat ikerketa egin ditu Udalak adineko pertsonen inguruko informazioa biltzeko eta haien bizi-kalitatea hobetzen jarraitzeko. 2017 urtean ekin zitzaien ikerketa horiei, Baigera jubilatu eta erretiratuen elkartearekin batera. Lehenik eta behin 80 urtetik gorako biztanlerian oinarrituta; ondoren, 2018an, 75-80 urte bitarteko herritarrak ikertu zituzten. 2019an, 70-75 urte bitarteko multzoa aztertu zen eta, azkenik, 2020an, 65-70 urte bitarteko pertsonak izan ziren ikerketaren ardatza. Ikerketa aldia, ordea, COVID-19aren pandemiarekin bat etorri zen, eta horrek bereziki eragin du informazio eta datu horietan guztietan.


Hori dela eta, joan den azaroan hasitako ikerketan Azpeitian bakarrik bizi diren 65 urtetik 80 urte arteko biztanleriarengan COVID-19ak izan duen eragina aztertu nahi izan da, bereziki azken bi urteetan hartu diren neurriek nola eragin duten haiengan; hain zuzen, zahartzaroan dauden eta bakarrik bizi diren pertsonek izan dezaketen bakardade sentimendua.

Izan ere, bakardadea subjektiboa edo objektiboa izan daiteke; hau da, bakardade objektiboa fisikoki bakarrik egotea da, eta hori hautatua izan daiteke edo ez, baina ez ditu nahitaez sentimendu ezkorrak eragin behar. Bakardade subjektiboa, berriz, zuzenean lotuta dago sentimendu negatiboekin, nahi ez den bakardade sentipena eragiten duelako.

Bakardadea bizitzako edozein alditan senti daiteke, eta horri erantzutea jendarte osoaren erantzukizuna da, eta Udalak lehentasunezkotzat du herritarren babes soziala orokorrean, eta arreta berezia eskaintzen die adineko pertsonei.

Ikerketa honetan, Azpeitian bakarrik bizi diren 65 eta 80 urte bitarteko 321 herritar hartu dira kontuan, eta horietatik, 176 herritarrekin harremanetan jartzea lortu da. Ikerlanean parte hartu dutenetatik %73,9 emakumeak izan dira, eta % 26,1 gizonak, eta bakarrik bizi diren arren, % 91,5ek familia du Azpeitian.

Besteak beste, honako ondorio hauek eman ditu ikerketak:


• Ikerketan parte hartu duten pertsonek osasun ona dute eta ohitura osasungarriak dituzte, gehienak autonomoak eta independenteak dira eta ez dute laguntza formal edo informalaren beharrik.
• Ikerketa honek erakutsi du COVID-19aren ondorioak uste baino leunagoak izan direla bai
familia harremanetan bai harreman sozial eta lagunartekoan. Eta ikusi da herritar gehienek badutela sare sozial sendo eta estua, eta horrek bakardade sentipena urritzen du. Hala ere, bakardade sentipena espero baino hedatuago dago herritar multzo horretan.
• Aztertutako pertsonen ia erdiak –gehienak alargunak– aitortu du batzuetan bakardade sentipena izaten duela.

Sentipen horri aurre egiteko boluntarioen laguntza jaso edo boluntario izateko prest agertu dira elkarrizketatutako asko, eta bide bat izan daiteke, adin tarte honetako jendeak izan dezakeen premiari erantzuteko. Elkarrizketatuetako batzuek, boluntarioen zerbitzuaz gain, beste zerbitzu eta baliabide batzuk proposatu dituzte; hala nola, adinekoak elkartzeko gune berriak sortzea herrian; profesionalen zerbitzua areagotzea eta landa-eremuan bizi diren herritarrentzako arreta areagotzea.

Hortaz, ondorio garrantzitsua da bakarrik bizi diren adineko pertsonekin zer landu badagoela, sentitzen duten bakardade horri erantzuteko eta haien harreman sozialak indartzeko.

Bakardadeari aurre egiteko egitasmoa
Ikerketan bakardade sentipenari aurre egiteko boluntarioen laguntza jaso edo boluntario izateko prest agertu direla ikusita, Azpeitiko Udalak Adinkiderekin elkarlanean, egitasmo berri bat abiatu berri du.

Bakardade sentimendua duten azpeitiarrei, sentimendu hori arintzeko, berdinetik berdinerako eta belaunaldien arteko harremanak eta sarea sortzea da helburua. Hau da, boluntarioen eta bakardade sentipena duten herritarren arteko harremanak sustatzea eta elkarri laguntza afektiboa ematea da helburua.

Modu horretara, elkarri konpainia eginez, komunitatean duten presentzia handituz eta harreman sozialak sendotuz sentipen hori gutxitzeko.

Proiektua abian jarri berria da eta boluntarioa izan edo konpainia eskertuko luketen herritarrek Gizarte Zerbitzuetara jo dezake edo 607612470 telefonora deitu.