“Balorazio positiboa” eginda amaitu dituzte Gabonetako ekintzak

Udal Gazteria Sailak antolatzen dituen Gabonetako ekintzek gaur izan dute azken eguna. “Egin ditugun ekintzen balorazio positiboa egiten dugu, haurren eta nerabeen parte hartzea ere oso ona izan da, eta urteari bukaera ona eman diogula uste dugu”, esan dute antolatzaileek.

Gaur, LH5eko eta LH6ko haurrek mural bat ere margotu dute Iturritxiki ludotekaren ondoko horman. Haurren Eskubideen Nazioarteko Egunean ziren margotzekoak, baina eguraldiaren eraginez, atzeratu egin behar izan zuten.
Behin Gabonetako ekintzak amaituta, Udal Gazteria Saileko zerbitzu guztiek oporrak hartuko dituzte urtarrilaren 7ra arte.

Datozen egunetan ere ekitaldi ugari

Nahiz eta Gazteria Sailaren Gabonetako ekintzak gaur amaitu, datozen egunetan ere ekitaldi ugari izango dira herrian. Bihar, esate baterako, tokiko merkatariek eta ArtiEkin taldeko artisauek sustatuko Gabonetako azoka izango da lehen aldiz. Done Jakue kalean egingo da, Frontoi Txikiko eremutik plazara arte, 10:00etatik 20:00etara.

Hamasei postu jarriko dituzte, eta tokiko ekonomia sustatzeko eta bertako produktu zein zerbitzuez gozatzeko aukera eskainiko du. “Gabonetan ere bertan erosteko aukera eskaini nahi diegu herritarrei, hainbeste gustatu ohi den Gabon kutsuko azoka formatua Azpeitira ekarriz, bertako merkatari eta artisauen bidez”, azpimarratu dute antolatzaileek.

Gabonetako haur parkea, zinema, Kirolaz Blai, puzzle kaxa eta abar ere izango dira datozen egunetan.