Bide Azpiegituren foru diputatuarekin bildu da Nagore Alkorta alkatea

Urola Erdiko alkateek eta eskualdeko eragile sozioekonomikoek bide azpiegituren egoeraren eta egun dauden premien berri eman diote Maria Ubarretxena Bide Azpiegituretako foru diputatuari.

Nagore Alkorta Azpeitiko alkatea, Ana Azkoitia Azkoitiko alkatea, Mikel Arregi Zestoako alkatea, Begoña Beobide Iraurgi Berritzeneko zuzendaria, Naiara Aldazabal Biele Groupeko ordezkaria eta Marian Etxeberria Grupo Seineko ordezkaria Maria Ubarretxena Bide Azpiegituren diputatuarekin eta Mikel Uribetxeberria sail horretako zuzendariarekin bildu ziren atzo. Eskualdeko bide azpiegituren egoera eta egun dauden beharrak azaldu zizkieten.

Urola Erdiko bide azpiegitura sistema hobetzeko beharra ondorioztatu zen eskualdeko 76 eragilerekin elkarlanean egindako Elkarrekin Urola Erdia Eraldatzen 2022-2027 hausnarketa estrategikoan. Behar horrek barne hartzen dituen azpilerroei lotuta, eskualdeko herritar nahiz eragile sozioekonomikoek duten mugikortasun bide sarea hobetu nahi da. Horretarako, udalen eta enpresen ordezkariekin osatutako batzorde bat sortu zen aurreko urtean, Urola Erdiko errepide sareak eskualde ikuspegitik behar dituen egokitzapenak nahiz hobekuntzak aztertzeko.

Besteak beste, Azpeitia, Azkoitia eta Zestoa arteko loturetan eskualdeko hainbat bide azpiegitura hobetu beharra ikusi zen; bereziki, Zumarragara zein Zestoako A8 autobidera joateko errepideak hobetzeko hainbat azterketa tekniko egiteko eskatu zen. Azpiegitura horiek hobetzeak, biztanleei mesede egiteaz gain, gure eskualdearen garapen eta bultzada sozioekonomikoa bultzatuko du.

Hurrengo bilera, ekainean

Maria Ubarretxena Foru Diputatuak balioa eman zion erakunde publiko eta pribatuen arteko elkarlanaren ondorioz egindako eskaera horiei, eta errepide sarearen azterketa teknikoa egiteko konpromisoa hartu zuen. Hurrengo lan bilera ekainean izango da, egindako azterketen emaitzak azaltzeko.