Bihar egingo da Esklabak Iturzulo eremuko 2. faseko babestutako 67 etxebizitzen zozketa

Bihar, ekainak 18, 19:00etatik aurrera egibgo da Esklabak-Iturzulo eremuko bigarren faseko babestutako 67 etxebizitzen zozketa. Antzokirako sarrera mugatua izango da eta prebentzio neurri guztiak hartuko dira. Udalak bere webgunean zuzenean ere eskainiko du zozketa, zozketa bertatik bertara jarraitzerik ez dutenentzat.

Azpeitiko Udalak babestutako 67etxebizitza zozkatuko ditu bihar arratsean; 39 babes ofizialeko etxebizitza eta erregimen bereziko 28 etxebizitza tasatu. Esklabak Iturzulo eremuko bigarren faseko etxebizitzak izango dira hain zuzen. Onartu eta baztertuen behin betiko zerrendak ere argitaratu dira eta guztira, 254 lagunek hartuko dute parte zozketetan.

Azpeitiko Udalak iazko urtearen bukaeran jarri zuen Esklabak Iturzulo eremuko bigarren faseko etxebizitzak esleitzeko prozedura abian. Udalaren asmoa, apirilaren hasieran zozketa egitea bazen ere COVID19ak eragindako alarma egoerak bete-betean jo zuen, eta prozedura administratiboak etenda izan dira ekainaren hasierara arte. Hala ere, posible izan denean, ahalik eta azkarren egingo du zozketa.

Bete beharreko protokoa
Alarma egoera dela eta, COVID-19 gaitzaren hedapena prebenitzeko protokoloak bete beharko dituzte bihar Soreasu antzokian izango direnek. Honakoak dira Udalak zozketara joango direnei emandako zehaztapenak:

• Jende pilaketarik ez sortzeko, denboraz joatea komeni da
• Eraikinera sartzeko ezinbestekoa izango da maskarilla janztea
• Sarreran eskuak garbitu beharko dira.
• Antzokian hiru ahulkitik behin eseritzeko aukera izango da
• Behin eserita, derrigorra ez den arren, segurtasun distantzia errespetatuko delako, gomendagarria da maskarilla jantzita izatea.
• Zozketa bukatzean, irteera ezkerretara dagoen atetik egingo da

Zozketako prozedura
Zozketa egunean, lehenengo Esklabak Iturzulo eremuko babes ofizialeko etxebizitzen zozketa egingo da; horretarako zenbakiak ontzian sartuko dira eta ondoren 39 etxebizitza esleitzeko adina zenbaki aterako dira. Hurrengo zozketa Esklabak Iturzulo eremuko erregimen bereziko etxebizitza tasatuena izango da; eta horretarako zenbakiak ontzian sartuko dira eta ondoren 28 etxebizitza esleitzeko adina zenbaki aterako dira.
Azkena ateratzen den zenbakiak itxaron zerrenda egiteko balioko du. Horrela azken zenbakiaren hurrengoa itxaron zerrendako lehenengoa izango da zerrenda guztietan.

Lehen fasea, abian
Azpeitiko Udalak etxebizitza eskubidea bermatzeko helburuarekin, azken urteotan babestutako mota desberdinetako etxebizitzen inguruko plana darama aurrera. Herriko eremu desberdinetan, alokairu, babes ofizialeko,tasatutako eta lokairurako etxebizitzen eskaintza zabala biltzen du planak. Planaren lehen fasea exekuzioan dago eta dagoeneko hasita dira Esklabak Iturzulo eremuko etxebizitzak eraikitzen; Done Jakue kaleko obrak lehiaketa publikoan dira eta Bustinzuriko Errebalekoak era laster izango dira.