Bihar hasiko dituzte Etxe-Alaiko lanak

Etxe-Alai auzoa eraberritzeko lehen faseko lanei ekingo die bihar Azpeitiko Udalak. Berrurbanizatu egingo da eremua, hau da, zabaldu egingo da espaloia eta eguneratu egingo dira zenbait azpiegitura.

Aurreikuspenen arabera, hiru hilabete inguruko iraupena izango dute lehen fase honetako lanek. Art Eraikuntzak enpresari esleitu zaio obra.

Lanak egin ahal izateko, tarteka itxi egingo da errei bat, eta egun horietan karakoletik bideratuko da trafikoa goranzko noranzkoan. Zehazki, Etxe Alaia 4 eta 9 zenbakien atzeko aldeko eremuan egingo dira lanak lehen fasean, parke aldera dagoen zatian hain zuzen.