Bihar iritsiko dira pajeak gutunak jasotzera, eta, etzi, erregeen kabalgata izango da

Bihar, urtarrilak 4, Baigera Jubilatu Elkarteak antolatuta Meltxor, Gaspar eta Baltasar erregeen pajeak gutunak jasotzen izango dira sanagustinpean, 17:30etatik aurrera. Etxi, Urtarrilaren 5ean, berriz, Erregeen etorrera izango da. Iaz bezala, Lasaotik Azpeitiara arteko bidea tren txu-txuan egingo dute, eta tren museoan etorrera ikusteko ohitura izan dutenek, Parrokia aurrean ikusi ahalko dituzte erregeak.

Urtarrilaren 5ean, ohiturari jarraituz 17:00ak inguruan Lasaora iritsiko dira hiru erregeak. Hango bisita egin ostean, 17:30ak aldera, parrokiara etorriko dira,jaiotza ikustera eta haurrei kaso egitera. Ondoren, 19:00etan, igerilekutik erregeen kabalgata hasiko da. Urtero bezala, herriko ikastetxeetako gaztetxoek lagunduko diete ibilbidea egiten. Igerilekutik plazara bitartean 600 kilo inguru gozoki banatuko dituzte herritarren artean. 20:00ak aldera iritsiko dira plazara, eta udaletxeko balkoitik herritarrak agurtu ondoren, deskantsatzera joango dira. Gau luzea izango dutelako.