Bigarren ongietorri ekitaldian, herriko eragileak ere bai

Azpeitiko Udalak, bigarren aldiz, ongietorri ekitaldi bat antolatu du Azpeitian erroldatu berri diren guztientzat. Bihar arratsaldean izango da, Basazabal jauregian. Udal ordezkariek ez ezik, herriko eragileek ere parte hartuko dute.

Azaroaren 1etik urtarrilaren 31ra bitartean Azpeitian erroldatu diren pertsona guztiak gonbidatu ditu udalak ekitaldira, telefonoz deituz. Lehenik eta behin, ongietorria emango die Nagore Alkorta alkateak; era berean, herrian zer zerbitzu eta baliabide dauden azalduko die.

Helburua ahalik eta harrera integralena egitea da. Horregatik, hemendik aurrerako ongietorrietan, herriko eragileek ere parte hartzea nahi du udalak, txandaka. Biharkoan, liburutegiko, udal euskaltegiko eta Elkar-Ekineko kideak izango dira ongietorrian. Hain zuzen, hiru espazio horietan zer zerbitzu eskaintzen dituzten kontatuko diete bertaratzen direnei.

Euskaraz izango da ekitaldia, Telegram bidezko itzulpenarekin. Amaieran, elkarrekin mokadutxo bat egingo dute guztiek, elkar ezagutzeko eta modu informalago batean elkarrekin berriketan jarraitu ahal izateko.

Zerbitzuen gida, berrituta

Zerbitzuen gida bat ere banatuko zaie ongietorrira joaten diren guztiei. Duela gutxi berritu du gida hori udalak, eta euskara hutsez ez ezik, beste bost hizkuntzatan argitaratu du: euskara-gaztelania, euskara-ingelesa, euskara-frantsesa, euskara-arabiera eta euskara-urdua. Gidan, informazio praktikoa ematen da, hau da, herrian dauden baliabide eta zerbitzuei buruzko informazioa eta horien helbide eta telefonoak ageri dira.

Azaro amaieran egin zuen udalak lehen ongietorri saioa. Berrogeiren bat pertsonak parte hartu zuten, eta esker onez jaso zuten ekitaldia. Emun kooperatibaren aholkularitza izan du udalak prozesuan.