Danbor hotsek, etenik ez

Irudi ederrak utzi zituen, atzo, San Sebastian bezperako danborradak: Mendizaleak taldearen 50. urteurrena, Perdillegi taldearen estreinaldia, inoiz baino danbor talde gehiago plazan, kaleak ikuslez beteta… Ohi bezala, gauerdikoa izan zen momenturik hunkigarriena. Aurten, gainera, aurreko minutuetan jarritako audio batean, herritarrek danborradan zer sentitzen duten entzuteko aukera izan zen.

Gaur ere, goizean goiz atera dira Ardo Zaleak eta Gure Ametsa taldeetako kideak, Azpeitiko Udal Musika Bandarekin eta Juan Antxieta musika eskolako kideekin batera kaleak alaitzera. Mezaren ostean, sokamuturra izango da, baina zalantzarik gabe, haurrak izango dira gaurko protagonistak.

12:30ean hasiko da haien danborrada. 500 ume baino gehiago aterako dira hamar taldetan banatuta, atzetik Aitor Expositok egindako karroza dutela. Gauerdian bandera jaitsi arte, festak ez du etenik izango Azpeitian.

EGITARAU OSOA