Darahli elkartearekin hitzarmena sinatu du udalak, Saharako lau haurrek Azpeitian igaro dezaten uda

Lau haur saharar Azpeitian daude dagoeneko, eta herriko familiekin pasatuko dute uda, Oporrak Bakean programari esker. Egonaldi horien kostuei aurre egin ahal izateko, Azpeitiko Udalak hitzarmen bat sinatu du Darahli Mendebaldeko Sahararekiko Elkartasun Elkartearekin, eta 4.000 euroko laguntza emango dio.

Darahli elkarteak hamar urte baino gehiago daramatza Oporrak Bakean programa antolatzen. Hain zuzen, programa horren helburua da uda pasatzera etortzen diren haur sahararren osasuna hobetzea, elikadura orekatuari eta mediku azterketei esker. Horrez gain, helburuen artean daude haurren egoera pertsonala nahiz soziala hobetzea ere. Era berean, progamaren bidez, euskal gizartea ere sentsibilizatu nahi da Saharako gatazkaren aurrean.