Datorren astean izango dira Iturritxiki eta Txiki Txoko ludoteketako eta Gaztelekuko izen-emateak

Udako oporraldiaren ostean, laster jarriko dituzte martxan berriro ere haur eta nerabeentzako udal zerbitzuak: irailaren 30ean ludotekak eta urriaren 1ean Gaztelekua. Gaur goizean, Gaztelekua handitzeko lanen, aurtengo ikasturteko eskaintzaren eta hezitzaileen lan metodologiaren berri eman dute Ander Larrañaga Gazteriako zinegotziak, Aloña Larrañaga Gazteria teknikariak eta Aitor Azpiazu ludotekako hezitzaileak.

Gazteriako zerbitzuetan dagoen “mugimendua” adierazten duten hainbat datu eman ditu Ander Larrañagak: Iturritxiki ludotekan, 169 haurrek eman zuten izena iazko ikasturtean, eta, batez beste, 44 haur joan ziren egunero; Txiki Txoko ludotekan, 151 izen-emate izan zituzten, eta 29 erabiltzaile joan ziren egunero. Gaztelekuari dagokionez, DBH1 mailan bakarrik, 132 nerabek eman zuten izena, eta adin tarte guztiak kontuan hartuta, 56 erabiltzaile izan zituzten egunero. Gazteriatik sustatutako eskaintzen artean, udako udalekuak izaten dira jendetsuenak: 500 haur baino gehiago izaten dituzte urtero.

Erabiltzaile kopurua asko hazi da azken urteotan, eta datuak pozgarriak izan arren, hainbat behar ere sortu dira. “Gaztelekua txiki geratu zaigu, eta hasi berri ditugu handitzeko obrak. Gabonen bueltarako amaitzea aurreikusten dugu, eta 90 metro karratu gehiago hartuko ditu espazio berriak”, azaldu du zinegotziak.

Espazio berri horren erabilerari buruzko barne lanketa bat egiten ari dira Gaztelekuan, eta laster erronda bat egingo dute ikastetxeetan, adin ezberdinetako nerabeen nahiak kontuan hartuz, espazioa nola egokitu erabakitzeko.

Ate irekiak 

Egunotan izan dira ludoteketako eta Gaztelekuko hezitzaileak herriko ikastetxeetan, eta HH5eko eta DBH1eko ikasleek ate irekiak ere izan dituzte. “Hurrengo astean, gurasoentzat irekiko ditugu ateak, eta izen-ematea ere orduan izango da”, azaldu du Aloña Larrañagak.

HH 5etik LH 6ra arteko haurrek dute ludoteketara joateko aukera, eta 20 euroko kuota ordaindu behar izaten da ikasturte osorako. Gaztelekuan, DBH1etik Batxi2 arteko nerabeak hartzen dituzte. Doakoa da, baina beharrezkoa da izena ematea.

Haur eta nerabeen “bidelagun”

Ludoteka zein Gaztelekuak haur eta nerabeen heziketarako bideratutako zerbitzuak dira. Jolasaren bidez, egunerokotasunean baliagarriak izango zaizkien tresnak barneratzen laguntzen zaie haurrei. “Horien artean daude elkarrenganako errespetua, talde kohesioa, harreman osasuntsuak, gatazken kudeaketa, autonomia...”, azaldu du Azpiazuk. Jolas libreari garrantzi berezia ematen diote, “haurra bere ikasketaren protagonista bihurtzen delako, eta bere burua ezagutzera eta hausnartzera bultzatzen duelako”.

Hezitzaileen funtzioa umeen eta nerabeen “bidelagun” izatea da, haien ondoan egotea, konfiantzazko harremanak sortzea eta haien beharrak identifikatzea. “Behar horiek identifikatu ondoren horiei erantzuna ematen saiatzen gara. Alde batetik, materialaren edo espazioaren moldaketak egiten ditugu ludoteka haurren beharretara egokitzeko. Bestalde, haurrekin lana egiten duten udal eragile zein ikastetxe guztiekin harremanetan gaude uneoro”.

Elkarlan horren garrantzia nabarmendu du Azpiazuk. “Haurrekin sortzen dugun harremanak laguntzen digu lehen aipatu ditugun behar horiek identifikatzen eta erantzuna denen artean ahalik eta egokien ematen”, gaineratu du.

IZEN-EMATEAK:

Ludotekak: irailaren 23tik 27ra.

- Arratsaldez: 15:30-19:00, astelehenetik ostiralera.
- Goizez: 10:00-12:00: asteazken eta ostiralean, Txiki Txoko ludotekan (Sanjuandegi); eta astearte eta ostegunean, Iturritxiki ludotekan.

Gaztelekua: irailaren 25etik 27ra

- Arratsaldez: 15:30-19:30, asteazkenetik ostiralera.
- Goizez: 09:30-13:30, ostegunean

GAZTERIAKO ESKAITZA

ZERBITZUAK: Iturritxiki ludoteka eta Txiki Txoko ludoteka (HH5-LH6) eta Gaztelekua (DBH1-Batx2). Urrestillan, familientzako gunea (0-6 urteko haur eta gurasoentzat); horrez gain, hamabostean behin, dinamizatzaile bat 5 urtetik gorakoekin zuzendutako ekintzak egiteko.

ESKAINTZA: haur eta nerabeentzako ekintza bereziak oporraldian. Gabonetan, Aste Santuan eta udan, udalekuak; hilean behin, larunbat arratsaldetan, haur filosofia tailerrak (LH3-LH6); bestelako hainbat egitasmo.

TOPAGUNEAK: azarotik martxora arteko igande arratsaldetan, neguko topalekua azoka plazan, LH3-LH6ko ikasleentzat (hezitzaileekin); asteburuetan, haurren familia txokoa kiroldegian (0-8 urteko haur eta familientzat).

FAMILIA ORIENTAZIOA ZERBITZUA: seme-alabekin ematen diren zailtasunei aurre egiteko aholkularitza zerbitzua (0-18 urte arteko seme-alabak dituzten gurasoentzat) eta izan ditzaketen arazoei aurre egiteko laguntza nerabeentzat (16-18 urtekoentzat, guraso gabe). Janire Basurto psikologoarekin.