Doluminak eta babesa adierazi nahi dizkiete Azpeitiko eta Errezilgo udalek atzo lan istripuan hildako langilearen senide eta gertukoei

Errezilgo eta Azpeitiko udalek atzo Nuarbeko Errastiola enpresan izandako lan istripuan hildako langilearen familia, lankide eta gertukoei doluminak eman eta bere elkartasuna adierazi nahi dizkiete. Golpe gogorra izan da herritarrentzat, eta bereziki langileriarentzat, atzo gertatutakoa. Elkartasunaz gain beharrezko laguntza guztia ere eskainiko diete hildako langilearen gertukoei, hala behar izanez gero.

Udalak enpresari zein Osalani istripuaren zergatiak aztertu eta lehenbailehen argitzeko eskatu nahi die. Era berean, enpresei deia luzatzen die, langile ororen lan osasuna eta bizitza egoera guztietan babesteko beharrezko neurri guztiak hartzeko oinarrizko baldintza gisa. Arazo oso larria da lan-istripuena; urtea hasi denetik Euskal Herrian lan istripuz hildako 66. langilea da Nuarbekoa.

Heriotza-istripua salatzeko eta familiari elkartasuna eta babesa adierazteko gehiengo sindikalak astearterako, abenduak 15, egindako deialdiekin bat egiten du Udalak eta herritarrak ere gauza bera egitera deitzen ditu.