Elektrotxarangak, larunbat arratsaldeak alaitzeko prest

Laugarren aldiz, Euskal Herriko Elektrotxaranga Lehiaketa antolatu dute Azpeitiko Udalak eta AZTE Azpeitiko Alde Zaharreko Tabernarien Elkarteak. Guztira zazpi elektrotxarangak hartuko dute parte, lau larunbatetan banatuta. Kaleko giroa sustatzea da lehiaketaren helburuetako bat.

Larunbat honetan (maiatzak 3) hasiko da, Züttik eta Elektrotxufla taldeen emanaldiarekin. Maiatzaren 10ean, berriz, Domusa Teknik lasterketa izango da herrian, eta elektrotxaranga bakarra aterako da: 3indarrok. Maiatzaren 17an, Elektrotxorongo eta Elektrokela aterako dira; eta maiatzaren 25ean, Patxangoi eta Xaukena.

Bi txandatan ariko dira elektrotxarangak: 19:00etan hasiko da lehen taldea eta 20:30ean bigarrena. Alde zaharrean barrena eskainiko dituzte emanaldiak. Epaimahaiak ekainaren hasierarako jakinaraziko du zein taldek irabazi duen. Irabazten duen elektrotxarangak 5.000 euroko saria jasoko du, eta saninazio jaietan emanaldi bat eskainiko du. Bigarren egiten duenak ere izango du saria aurten, 1.000 eurokoa.

Epaitzeko irizpideak

Epaimahaia musikan adituak diren pertsonek osatuko dute, eta hainbat irizpide izango dituzte kontuan irabazlea aukeratzeko: musikaltasuna, sonoritatea, interakzioa, martxan jotako musika, abestien aniztasuna, euskara, parekidetasuna…

Iazko lehiaketa Elektrotxufla elektrotxarangak irabazi zuen.