Elektrotxarangek alaituko dituzte maiatzeko larunbat arratsaldeak

Aurreko bi edizioek izandako arrakasta ikusita, III. Euskal Herriko Elektrotxaranga Lehiaketa antolatu dute Azpeitiko Udalak eta AZTE Azpeitiko Alde Zaharreko Tabernarien Elkarteak. Kaleko giroa sustatzea da lehiaketaren helburuetako bat.

Larunbat honetan (maiatzak 4) hasiko da, Elektrotxufla taldearen emanaldiarekin. Hurrengo hiru larunbatetan, berriz, bina elektrotxaranga ariko dira kaleak alaitzen: maiatzaren 11n, Game of Txaranga eta Hamarru; maiatzaren 18an, Patxangoi eta Elektrokela; eta maiatzaren 25ean, Xaukena eta Ostikada.

Bi txandatan ariko dira elektrotxarangak: 19:00etan hasiko da lehen taldea eta 20:30ean bigarrena. Alde zaharrean barrena eskainiko dituzte emanaldiak.

Epaimahaiak ekainaren hasierarako jakinaraziko du zein taldek irabazi duen. Irabazten duen elektrotxarangak 6.000 euroko saria jasoko du, eta saninazio jaietan emanaldi bat eskainiko du.

Epaitzeko irizpideak

Epaimahaia Azpeitiko musikariek osatuko dute, eta hainbat irizpide izango dituzte kontuan irabazlea aukeratzeko: musikaltasuna, sonoritatea, interakzioa, martxan jotako musika, abestien aniztasuna, euskara, parekidetasuna…

Iazko lehiaketa Elektrokela elektrotxarangak irabazi zuen.