Emakume guztiek informazio eta orientazio juridiko espezializatua izateko eskubidea bermatzeko, aholkularitza juridikoa eskainiko du udalak

Azpeitiko Udalak Emakume Txokoaren bidez, emakumeen ahalduntzea helburu duen zerbitzu integrala eskaintzen du. Emakume kolektibo desberdinen ahalduntzea ezinbestekotzat jotzen dute Azpeitia parekide eta justuagoa emateko bideam. Zentzu horretan, urtez urte, zerbitzua eta espazioa indartu asmoz, herritarren beharretatik abiatuta hobetzeko pauso garrantzitsuak ematen dira. "Aurten bizitzen ari garen pandemiak, argi utzi du emakumeok hamaika ertzetatik bizi dugun zaurgarritasun egoera. Osasun krisi honek agerian utzi du emakumeok ahalduntzearen garrantzia", adierazi du Nagore Alkorta alkateak. 

Aholkularitza Juridikoa eskaintzeko zerbitzua jarri berria jarri dute abian, oraingoan. Zerbitzuaren helburua, emakumeei, prozesu judizialen inguruko informazioa eta orientazioa eskaintzea da, "prozesu ahalduntzaileagoak eta kontzienteagoak izateko". 

Gai konplexuei buruzko kalitatezko informazio juridikoa eskaintzea da helburu: dibortzioak, emakumeen kontrako erasoei buruzko prozesu penalak, dibortzio prozesuetatik sortutako gatazkak, mantenu pentsioen ordainketa ezak, bisita erregimenak ez betetzeak, atzerritartasunarekin lotutako arazoak, etxeko langile zein gainontzeko langile emakumezkoen kaleratzeak, diskriminazioak, eskubideei buruzko informazioa, laguntza sozialak eta bestelako gaien inguruko kontsultak....

"Justiziarako sarbidea zuzenbide-estatuaren oinarrizko printzipioa da. Justiziarako sarbiderik gabe, pertsonek ezin baitute beren ahotsa entzunarazi, beren eskubideak errespetatuarazi edo diskriminazioari aurre egin", gaineratu du. Emakume guztiek informazio eta orientazio juridiko espezializatua izateko eskubidea bermatzea du helburu udalak, eta kasuak banan-banan aztertuko dira eta aholkularitza pertsonala eskainiko zaie erabiltzaieleei, "ezinbestekoa delako prozesuen jabe izatera heltzeko". Gatazkei aurre egiteko segurtasuna eta lasaitasuna lortuko dute zerbitzua jasotzen dutenek. Izan ere, helburu nagusienetakoa, ezagutzaren bitartez, eskura dituzten tresnak erabiltzeko prestutasuna eta ausardia handitzea izango da.

"Emakume guztiok informazio eta orientazio juridiko espezializatua izateko eskubidea bermatuko dugu, ezinbestekoa delako prozesuen jabe izatera heltzeko. Horrela, gatazkei aurre egiteko segurtasuna eta lasaitasuna lortuko dute zerbitzua jasotzen dutenek", gaineratu du Idoia Arrizabalaga Parekidetasun zinegotziak. 

Halaber, azpimarratu nahi du ohikoa den moduan, emakumeak arlo gehienetan bezala, prozesu judizialetan ere guztiz epaituak izaten direla: "Hori horrela, zerbitzu honek, beren kezkak lasaitasunez kontsultatzeko eta entzunak izateko aukera eskainiko die, epaituak izan gabe". Zerbitzua guztiz konfidentziala, profesionala eta doakoa izango da, eta ikuspegi feminista eta ahalduntzailea izango ditu.

Zerbitzuaren xeehtasunak

Aholkularitza Juridikoa Azpeitiko Emakumeen Txokoan emango da ostegunetan, 16:00etatik 19:00etara, bi astean behineko maiztasunarekin. Ezinbestekoa izango da hitzordua hartzea, horregatik, lehenago Emakumeen txokora deitu beharko da: 688 751 000 /943 157055