Emakume migratu zaintzaileen lehen topaketa antolatu du udalak

Azpeitiko Emakumeen Txokoak, Hegoaldetik Enarak Kooperatibako kideekin elkarlanean, emakume migratu zaintzaileen topaketa antolatu du. Emakume migratuen interesak, beharrak eta ezinegonak jasotzeko espazio bat izango da, aurrera begira, beste emakumeekin sareak eraikitzeko, komunitatea sortzeko eta kolektiboan ahalduntzeko bitartekoak eskaintzeko.

Topaketak bi helburu nagusi izango ditu; alde batetik, zaintza lanetan aritzen diren emakume migratuei konfiantzazko toki bat bermatzea, haien arteko sareak indartu eta bakardadeari aurre egiteko; eta, bestetik, emakume horien beharrak jasotzea, aurrera begirako lan proposamen bat osatzeko.

Saioa azaroaren 16an egingo da, Emakumeen Txokoan, goizez. Dena den, ordutegia parte hartu nahi dutenen artean adosteko ahalegina egingo da, emakumeen beharretara ahalik eta gehien egokitzeko. Topaketan parte hartzeko interesa dutenei 688 751 000 deitzeko eskatzen zaie, eta izena emandakoan zer ordutegi komeni zaien galdetuko zaie.