Itzulpen automatikoa / Machine translation

Energia Bulegoak 80 erabiltzaile baino gehiagori eman die zerbitzua lehen hiru hilabeteetan

2024/09/11
Energia Bulegoak 80 erabiltzaile baino gehiagori eman die zerbitzua lehen hiru hilabeteetan

Azpeitiko Udalak maiatzaren 6an jarri zuen martxan Energia Bulegoa, energiaren arloan izan ditzaketen zalantzak argitzen laguntzeko herritarrei. Done Jakue kalean dago bulegoa, eta doako aholkularitza eskaintzen du. “Zerbitzu berria da, orain arte ez dugu halakorik izan Azpeitian. Hala ere, hasieratik izan da mugimendua bulegoan, eta pozik gaude izandako harreragatik, are gehiago ikusita era askotako aholkularitzaren bila joan dela jendea”, esan du Joanes Amenabar Ingurumen Batzordeburuak.


Hain zuzen, lehen hiru hilabeteetan 80 pertsona baino gehiago joan dira Energia Bulegora: %49k faktura elektrikoarekin lotutako kontsultak egin dituzte; %26k, Ekindar kooperatibari buruzkoak; eta gainerakoek bestelako gaiei buruz galdetu dute (galdara aldatzeko aholkuak, plaka fotovoltaikoak instalatzeko dauden dirulaguntzak, ibilgailu elektriko bat erosteko dauden dirulaguntzak…).

Abuztuko oporren ostean, berriro ere ohiko ordutegian ari da lanean bulegoa: astelehen, astearte, asteazken eta ostiraletan, 10:00etatik 14:30era, eta ostegunetan, 17:00etatik 19:30era. Komeni da joan aurretik txanda hartzea, 943 119 806 zenbakira deituta edo energia@azpeitia.eus helbidera idatzita.

Besteak beste, honako zerbitzu hauek eskaintzen ditu Energia Bulegoak:

  • Faktura energetikoa (gasa eta elektrizitatea):
    • Faktura optimizatzeko aholkularitza zerbitzua.
    • Fakturen azalpena.
  • Dirulaguntzak:
    • Energia berriztagarrien proiektuak finantzatzeko laguntzen inguruko informazioa eta aholkularitza.
    • Autokontsumoko eta autokontsumo partekatutako prozesuen alderdi legalei buruzko informazioa eta aholkularitza.
    • Eskuragarri dauden dirulaguntzen deialdien inguruan informazioa.
    • Dirulaguntzen kudeaketarako laguntza.
  • Birgaitze energetikoa:
    • Fatxaden isolamendua (horma, leihoak, lurra, sabaia).
    • Ezaugarriak, onurak, dirulaguntzak…
  • Teknologia berriztagarrien inguruko informazioa eta ezaugarriak azaltzea:
    • Eguzki-energia termikoa, eguzki-energia fotovoltaikoa, aerotermia, hidrotermia, geotermia, biomasa, minieolikoa eta hidroelektrikoa.
    • Eraikinen eraginkortasun energetikoaren ziurtagiria:
      Informazioa eta betebehar legalak.
  • Difusio eta komunikazio lanak:
    • Prestakuntza: herritarrei zuzendutako prestakuntza saioak identifikatu eta bideratu. Enpresei zuzenduta: arkitektoei, finka-administratzaileei…
    • Hitzaldiak.

Uda amaitzera doan honetan, eta neguak energia kontsumoan ekarri ohi duen gorakada murrizten saiatzeko, gida praktiko bat ere prestatu du Energia Bulegoak.