Entitateetan eragitea izango da aurtengo Euskaraldiaren erronka nagusia

2020eko Euskaraldia antolatzeko lehen bilera egin zen atzo arratsean. Bertan, Eneritz Albizu Euskara batzordeburuak eta Imanol Amiano Euskaraldiko dinamizatzaileak aurtengo Euskaraldiaren inguruko azalpenak eman zituzten. Aurten entitatetan jarriko dela arreta adierazi zuten, baina 2018an bezala herritarrak izango dira abiapuntu, eta Ahobizi eta Belarriprest rolen artean aukeratu beharko dute herritarrek: “Udalak Euskaraldiaren aldeko apustu sendoa egingo du aurtengoan ere, eta horretarako baliabideak jartzen ari gara gaurtik. Bide horretan, Euskaraldiari indarra eman eta sortzen diren beharrei eta eginbeharrei erantzuteko koordinatzailea jartzeko apustua egin dugu”. Azpeitia euskararen arnasgunea izanagatik, herritarron-hizkuntza ohituretan eragin beharraren garrantzia ere azpimarratu nahi izan du: Azpeitia euskararen arnasgunea da, euskaraz bizi gara eta euskara naturala da guretzat. Dena den, natural egiteak kontzientzia galtzea ekar dezake askotan, eta hori landu beharra dago gurea bezalako herrietan. Izan ere, gaztelania erabiltzeko joerak eta ohiturak baditugu guk ere. Horrez gain, euskara Azpeititik kanpo zabaltzeko erronka polita dugu, gure naturaltasunetik jendeari euskaraz lehen hitza eginda, euskaraz aritzera gonbidatuta”.

Zer da Euskaraldia?
Euskaraldia euskara ulertzen duten hiztunen arteko ahozko* hizkuntza-ohiturak aldatzeko ariketa sozial masiboa da, gizartearen gune guztietara zabaldua eta denborari dagokionez mugatua.
Beste era batera esanda, Euskaraldiaren helburu nagusia herritarren hizkuntza ohiturak aldatuta euskararen erabilera handitzea da. Helduen aktibazioa du oinarri, eta ariketa egin ahal izateko gutxieneko baldintza euskara ulertzea da.

2018an egin zen lehen aldiz ariketa, Euskaraldia: 11 egun euskaraz; orduan norbanakoengan jarri zen fokua eta milaka izan ziren hizkuntza ohiturak aldatzeko helburuarekin ahobizi eta belarriprest moduan ariketan parte hartu zutenak. Euskal Herri osoan 225.000 lagunetik gora hartu zuten; Azpeitian 2.800 lagun inguru izan ziren izena eman zutenak. Parte hartzaileen ia %95a aho bizi izan zen eta %5a belarriprest.

Entitateetan eragitea helburu
2020an burutuko da bigarren edizioa, eta, oraingoan, entitateei ere ariketan parte hartzeko gonbidapena egingo zaie, euren eremuetan hizkuntza ohiturak aldatzeko urratsak ematen has daitezen, eta entitateko kideen parte-hartzea sustatu eta babestu dezaten. Horretarako entitateetan Ariguneak identifikatu eta horietan eragitea izango da helburua. Horretarako, Azpeitian, enpresa guztiei gutun bat bidaliko zaie Euskaraldiaren berri eman eta bertan parte hartzerako gonbita eginez.