Esker ona Corrado Masacciri, txotxongiloekin egindako lanagatik

45 urte daramatza txotxongiloekin lanean Corrado Masaccik, eta azaroaren 1etik, urte hauetan guztietan egindako lanen aukeraketa bat izan du ikusgai Betharrameko erakusketa aretoan. Gaur izan du azken eguna, erretiroa hartzera baitoa. Azken hamar urteetan, urtero parte hartu du Euskal Antzerki Topaketetan, eta egindako lana eskertu diote Azpeitiko Udalak eta Kulturaz kooperatibak.

"Zuri esker deskubritu ditugu askok eta askok txotxongiloak", esan dio Aitor Larrañaga zinegotziak. Urteotan, ugari izan dira Masacciren erakusketan izan diren ikasleak ere. "Badakigu goizean eskolatik etorri, eta txundituta geratu, eta gero arratsaldetan gurasoekin etortzen zirenak ere asko izaten zirela. Baita gero etxean txotxongilo propioak egiteko ahalegina egiten zutenak ere". Topaketei egindako ekarpena eta urtero hain proposamen "erakargarriak" ekartzeko egindako lana eskertu dizkio udalak.

Datozen urteetan ere txotxongiloek izango dute tokia Euskal Antzerki Topaketetan, Topic zentroak hartuko baitu Corrado Masacciren lekukoa.