Eskola Kirol egokitua: Aniztasun funtzionala duten herritarrentzako kirola egiteko aukera

Iazko abiatutako esperientziari jarraituz, Eskola Kirol Egokituaren eskaintzari jarraipena emango diote ikasturte honetan ere. Dagoeneko eman daiteke izena eta Egoitz Arruti Kirol Batzordeburuak "aniztasun funtzionala duten herritarrak probatu eta parte hartzera" gonbidatu ditu. 

Ikasturte berriarekin batera ekingo diote aurten Eskola Kirol Egokituari. Azpeitiko Udalak eta Azkoitikoak, Gipuzkoako Foru Aldundiak, Kirol Egokituko Federazioak eta Marea Urdinak elkarlanean landuta iaz jarri zen martxan. Abiapuntuko esperientzia onaren ostean, aurten, ikasturte osorako aukera zabldu dute. Atzo proiektua aurezten izan ziren, Egoitz Arruti Azpeitiko Udaleko Kirol batzordeburua,  Sonia Vazquez Azkoitiko Udaleko Kultura eta Gazteria zinegotzia, Ander Agirre Gipuzkoako Foru Aldundiko Kirol teknikaria, Amaia Elizondo Gipuzkoako Kirol Egokituaren Federazioko ordezkaria  eta Aritz Orbegozo Marea Urdina elkarteko kidea.

Aurkezpenean, kirola egiteko aukera izatea eskubidea dela eta kirolak herritarren bizi kalitatean duen eragina nabarmendu nahi izan zuten. Hala, gogorarazi zuten aniztasun funtzionala duten herritarrek duela gutxi arte kirola edo ariketa fisikoa egiteko aukera gutxi edo batere ez dutela izan. Eskola Kirol Egokituaren bidez, herritar horiei kirol egokitua egiteko zerbitzua eskaini nahi zaie. Iaz 10 lagunek hartu zuten parte proiektuan eta abiatutako bidea jarraituz, aurtengorako eskaintza osatu dute.

Azpeitian, irekita dago izen ematea. 6 eta 12 urte bitartekoek Eskola Kiroleko Eskaintzarekin batera eman ahal izango dute, ikastetxeen bidez. Arrutik zehaztu duenez, "izena ematen duten erabiltzaileei egokitutako eskaintza edo jarduerak zein ordutegia zehaztea" da asmoa. 12 urtetik 21 urte bitartekoek, igerilekua izango dute jardueretako leku edo abiapuntua eta bertan eman beharko dute izena. Bi talde osatu nahi dira eta astelehenetan eta asteazkenetan, 17:00etan eta 18:00etan eskainiko dira saioak.

Elkarlana abiapuntu

Eragileek elkarlanaren garrantzia eta beharra azpimarratu nahi izan zuten. Agirrek, "eragileen arteko hartu-emana" eta aniztasun funtzionalari "normaltasuna" ematearen beharra aipatu zituen. "Aniztasun funtzionala duten pertsonetan eragitean, herritar guztietan eragiten da". Elizondok, bere aldetik, federazioak zerbitzuaren inguruko aholkularitza eskaintzen duela eta "benetako meritua" eragileek zutela zehaztu zuen. Eta Eskola Kirol Egokituaren bidez, "espazio inklusiboetan" parte hartzeko aukerak ere sortzen direla gaineratu zuen. Orbegozok, bukatzeko, "pelota, aniztasun funtzionala duten pertsonen familietan" dagoela  eta "errazena etxean gelditze" dela esan zuen, "gurea ez den lekua dela pentsatuz".  Talde txikietan, erabiltzaileen beharrak aztertuta eta horietara egokitutako ekintzak direla esanez amaitu zuen.