Esleitu dira Karmelo Etxegarai ikastolaren Perdillegiko eraikineko sarrera irrisgarriago egiteko obrak

Azpeitiko Udalak Karmelo Etxegarai Ikastolarekin Perdillegi kaleko eraikinerako irisgarritasuna hobetzeko lanak esleitu ditu. Obra horien bidez, Perdillegi kaleko 2 zenbakian dagoen ikastetxeko sarrera nagusia irisgarriagoa egingo da; bertan, 6 eta 12 urte bitarteko hezkuntza ikasketak garatzen dira.

Obren bidez, gaur egungo sarrera nagusiko eskailerak eraitsiko dira eta hiru aukera eskainiko dira sartzeko, bi oinezkoentzat eta bat ibilgailuentzat. Oinezkoentzat eskailera eta arranpa egingo dira, irisgarritasuna bermatzeko.

Obra horiekin batera, sarreran estalpe bat ere egingo da, autobusaren zain egoteko.

Azaroan hasiko diren lanek 65.147,24€ko aurrekontua dute eta bi hilabeteko epean egingo dituzte.