Estalitako gune berria jolaserako
2024/06/21
Karmelo Etxegarai ikastolaren Euskal Herria kaleko eraikinean, hau da, HHko haurrak hartzen dituen eraikinean, amaitu dituzte kanpoko jolastokia hobetzeko lanak. Estali egin dute jolastokiaren zati bat, euria ari duenean ere kanpoan jolastu ahal izateko haurrek.
Saltoka aritzeko ohe elastiko batzuk, zintzilikatzeko barrak, eserita egoteko guneak eta abar jarri dituzte estalitako eremu horretan. Inklusibitate irizpideak ere kontuan hartu dituzte diseinuan, eta, besteak beste, irisgarritasuna bermatzeko neurriak hartu dituzte.
Bi lotetan banatu zen obren kontratuta, eta Urbitarte enpresari esleitu zitzaizkion. 227.509 euroko aurrekontua izan du estalkiak eta 82.158 eurokoa eremu berria egokitzeko lanek.
Beste herri batzuetan ez bezala, Azpeitian, ikastetxeetako jolastokiak edozein herritarrentzat zabalik egoten dira eskola orduetatik kanpo ere; baita asteburuetan eta udan ere.