Euskal Antzerki Topaketetan taularatzeko obra proposamenak aurkezteko epea zabalik da

Ohi bezala azaroan egingo diren Euskal Antzerki Topaketetan parte hartu nahi duten antzerki obren proposamenak bidaltzeko epea zabalik da, apirilaren 20a bitartean.

Aukeratzen diren antzezlanak 2020ko azaroan zehar taularatuko dira, Euskal Antzerki Topaketen baitan, hain zuzen ere. Topaketetan, haur, gaztetxo, zein helduentzako antzerki obra amateurrak zein profesionalak eskaini ohi dira.

Deialdi honetara aurkezteko Euskal Herriko taldea izatea eta antzezlana euskaraz izatea ezinbestekoa da. Aurkeztu behar den materiala honakoa da: obraren aurkezpena; sinopsia, edo laburpena; fitxa tekniko eta artistikoa; eta material grafikoa.

Proiektuak modu elektronikoan aurkeztu behar dira, Azpeitiko udaleko weborrian sartu eta online tramitatuta. Zalantzak argitu edo informazio gehiagorako 943 15 70 68 telefonora deitu edo kultura@azpeitia.eus helbidera idatz daiteke.