Itzulpen automatikoa / Machine translation

Euskara Mahaiak abiatu du bere ibilbidea, Euskara Plana oinarri hartuta

2023/02/09
Euskara Mahaiak abiatu du bere ibilbidea, Euskara Plana oinarri hartuta

Hilabete luzez ondutako 2023-2026 urteen arteko Euskara Plana onartu zen aho batez astearteko plenoan. Horrenbestez, plana indarrean da. Asteazkenean, berriz, plan horretatik abiatuta sortutako Euskara Mahaia elkartu zen lehen aldiz; 18 herritar elkartu ziren hainbat eragileren ordezkari zenbait eta norbanako gisa beste batzuk. 


Euskara Plana iritsi da abiapuntura: martxan jartzera. Azpeitiak behar duen plana osatzeko helburuz, iazko udazkenetik hainbat bilera eta inkesta egin dira herritarrek euskararen inguruan duten ikuspuntua eta kezkaz ezagutu eta horien inguruan hausnartzeko. Plana osatuta aurkeztu zuten urtarrilaren 25ean eta aste honetan tramite ofizialei bukaera eman zaie otsaileko ohiko plenoan onartuta.

Paperean bildutakoa praktikara eraman eta jarraipena egiteko helburuz, berriz, Planean jaso bezala, Euskara Mahaia sortu da. Lehen bilera asteazkenean egin zen eta eregileetako ordezkari eta norbanakoen artean 18 lagun bildu ziren. Lehen saio horretan mahaiaren dinamika zehaztu eta 2023rako ekintza plana eta erronkak zehazteari ekin zioten. 

Euskara Mahaiak urtean hiru bilera egitea adostu zuen: urtearen hasieran, urteko plangintza osatu eta onartzeko; urte erdian jarraipenerako eta, bukaeran, ondorioak ateratzeko. 2023ko datozen bi bileretarako datak jarri zituzten: Maiatzaren 10ean eta azaroaren 8an; bi bilerak 18:30etan Basazabalen izango dira. 

Euskara Mahaia irekia da eta herritar orok har dezake parte bertan.