Festa lehertzeko prest da Azpeitia
2023/07/17
Uztailaren 21etik abuztuaren 2a bitartean ia 100 ekintza izango dira Azpeitian adin guztietako herritarren gozagarri. Gaur bertan hasi dira etxez etxe programa banatzen eta arratsaldean aurkeztu dute egitaraua eragileek eta udalak.
Egun gutxi falta dira festak Azpeitia hartzeko. Aniztasun Egunaz gozatuta, larunbatean, Umeen Egunean, haur eta erraldoiek hartuko dute Azpeitia eta festa giroa izango da nagusi herrian. Gaur aurkeztu dute herriko eragileek eta udalak elkarlanean antolatutako datozen egunotako egitaraua.
Uztailaren 21ean hasi eta abuztuaren 2ra arte izango da zer ikusia eta zer gozatua herrian. Ia 100 ekitaldi izango direla dierazi du Mikel Odriozola Festa Batzordeburuak: “Denetarik eta denentzako ekitaldiak izango dira. Kultura, kirola zein aisialdirako ekintzak antolatu dira. Aurten, bereziki gaztetxoentzako ekintzak indartzen saiatu gara”. Bide horretan Matxinada kaleko plazatxoan gaztetxoentzako hainbat ekintza antolatu direla aurreratu du.
Egitarauko zerbait aipatzen hasita zaila izan du aukeratzea: “Haurren eguneko erraldoien lehiaketa, Deñe, Chambao, Piztiak, Puro Relajo edo Pantxoa Karrereren kontzertuak, Sagardo, gazta eta ganadu txapelketak, iaz, izugarrizko arrakasta izan zuen Tio Teronen Semeaken ikuskizuna edo saltsa jartzen duen Bakailu txapelketak aipatuko nituzke. Bada zer aukeratua”, azaldu du.
Guzti honen antolaketan dabiltzan eragile eta norbanakoak ere eskertu nahi izan ditu: “Herritar eta bisitariek festaz gozatu ahal izateko beste azpeitiar asko eta asko ibiltzen dira festen antolaketan lanean. Norbanako, eragile eta udal langile guztiak eskertu nahi ditut, Guztien lan eta koordinaziorik gabe ezinezkoa izango zelako antolatu dugun egitaraua antolatzea”. Bukatzeko, datozen egunotan lanean ari diren horiek errespetatzeko ere azpimarratu nahi izan du.
Adinekoen zaintzaileak protagonista
Saninazio bezperan, adinekoen zaintzaileak izango dute txupinazoa botatzeko ohorea, duela zenbait egun udalak aurreratu bezala. Herrian asko dira adinekoen zaintzan ari diren profesionalak eta horiek jarri nahi izan ditu festaren erdigunean udalak. San Martin Egoitzan, etxez etxeko zerbitzuan, Eguneko zentroan zein etxeetan interna ibiltzen dira profesionalak. Eta horiek izango dira udaletxeko balkoian.
Zaintzak emakume aurpegia du. Eta txupinazoaren protagonistak ere emakumeak izango dira. Lau emakume izango dira Azpeitian zaintza lanetan ari direnen ordezkari: Laia Juez Mancebo, Mailu Etxeberria Sudupe, Maryuri Nikoska Diaz eta Eider Irureta Uribesalgo izango dira Nagore Alkorta alkatearen ondoan txupinazo garaian.
Erasorik gabeko festak
Festak gozatzeko badira ere, tamalez, festetan eraso matxistak areagotu” egiten direla gogorarazi du Arrietak. “Urtean zehar egiten dugun lanketa, festen baitan indartu egin dugu”, zehaztu du. Uztailean, bai da bai legearen inguruko hitzaldia antolatzeaz gain, erasoen aurrean festa guneetan nola jokatu behar den azaltzeko protokoloa egokitu eta azalpenak emateko erronda egingo du. “Berdintasuna landuz erasoak ekidin edo aurre egitea lehentasunezkoa eta estrategikoa da eta prebentzioa dela uste dugu gakoa. Festetan zein urte osoan landu eta bultzatzen ditugu indarkeria matxistaren eta gizarte parekideago bat osateko politikak” gaineratu du.
“Festetan denok ondo pasatzea nahi izaten dugu, eta merezi dugu. Saninazioak, denok gustora, libre eta seguru pasatzeko dira, eta denon esku dago horrela izatea. Arretaz ibil gaitezen inguruan gertatzen denaz ohartzeko, zerbait somatuz gero erasoak aurreikusi eta laguntzeko, babesteko eta harreta eskaintzeko”.