Gautenak herrian eskainiko dituen zerbitzu eta proiektuen berri emateko bilera irekia izango da azaroaren 19an

Loiolabide auzoan, Gautenak epe motzean izango dituen zerbitzuetarako guneak egokitzen hasi berri dira. hori dela eta, Udalak, auzokideei eta interesa duen orori Gautena zer den, zer lan egiten duen eta Loiolabideko azpiegitura horietan eskainiko dituzten zerbitzuen berri emateko bilera irekia egingo du datorren asteartean, azaroak 19, 19:00etan, Udaletxeko 5. solairuan. Bertan Gautenako kideak eta udal ordezkariak izango dira. 

2018ko uztailean, Azpeitiko Udalak Loiolabide 65-67, 75-77 eta 81-83 etxe-atarien lokalen lagapena onartu zuen udalbatzan. Lokal horietan Gautena Autismoaren nahasmena duten pertsonen familien Elkartearen hainbat zerbitzu jartzeko egokitzapenak egiten hasi berri dira.

Azpeitiko Udalak Gautenak egindako eskari bati erantzun asmoz egin zuen lokal horien lagapena. Autismoa duten pertsonentzako eta beren familientzako azpiegitura eta zerbitzuak herrian eskaintzeko baliabideak eskaintzea onartuz. Obrak hasi berritan herritarren bildu nahi izan dute bi erakundeek proiektua azaldu eta zalantzak argitzeko.